ރާއްޖެއަށް އެތެރެ ކުރަމުން އަންނަ ކާރާއި ޖީޕް އަދި ވޭނުން މީގެކުރިން ނަގަމުން އައި ޑިއުޓީގެ މިންވަރު ކުޑަ ކުރުމަށް އިމްޕޯޓު އެކްސްޕޯޓު ގާނޫނަށް އިސްލާހު ހުށަހަޅައިފިއެވެ.
ރައްޔިތުންގެ މަޖިލީހަށް ގަމު ދާއިރާގެ މެންބަރު މުހައްމަދު ވިސާމު ހުށަހެޅުއްވި އެ އިސްލާޙުގައި ވަނީ އެ ތަކެތިން ނަގަމުން އަންނަ ޑިއުޓީން 100 ޕަސެންޓު ކަނޑާލުމަށް ހުށަހަޅާފައެވެ. މިހާރު އެ ތަކެތިން ޑިއުޓީގެ ގޮތުގައި ނަގަމުން އަންނަނީ 200 ޕަސެންޓު ޑިއުޓީއެވެ.
އެހެންނަމަވެސް ބޭނުން ކޮށްފައި ހުންނަ ކާރާއި ޖީޕް އަދި ވޭން ރާއްޖެއަށް އެތެރެ ކުރާ ނަމަ އެ ތަކެތިން 300 ޕަސެންޓު ޑިއުޓީ ނެގުމަށްވެސް ގާނޫނަށް ވަނީ އިސްލާހު ހުށަހަޅާފައެވެ. މީގެކުރިން އެތަކެތިން ނަގަމުން ދިޔައީ 150 ޕަސެންޓު ޑިއުޓީ ކަމަށްވީ ނަމަވެސް މިހާރު އިތުރު 150 ޕަސެންޓު އިތުރު ކުރުމަށް ވަނީ ހުށަހަޅާފައެވެ.
އެންމެ ބޮޑު އިސްލާހެއް ހުށަހަޅާފައިވަނީ ސިނގިރޭޓުން ނަގާ ޑިއުޓީ ބޮޑު ކުރުމަށެވެ. ގާނޫނުގައި މިހާރު އޮންނަ ގޮތަކުން ކޮންމެ ސިނގިރޭޓަކުން ޑިއުޓީގެ ގޮތުގައި ނަގަނީ ދެ ރުފިޔާއެވެ. ވިސާމް ހުށަހެޅި އިސްލާހުގައި ސިނގިރޭޓަކަށް ނަގާ ޑިއުޓީ ތިން ރުފިޔާއަށް ބޮޑުކުރަން ވަނީ ހުށަހަޅާފައެވެ.
އަދި ސިނގިރޭޓެކޭ އެއްގޮތަށް ބިޑިން ވެސް 25 ޕަސަންޓުގެ ޑިއުޓީ އެއް ނެގުމަށް ވަނީ ހުށަހަޅާފައެވެ. އެގޮތުން ކޮންމެ ބިޑިއަކުން ތިން ރުފިޔާ ނެގުމަށް އިސްލާހު ވަނީ ހުށަހަޅައިފައެވެ.
ސިނގިރޭޓުން ނަގާ ޑިއުޓީ ބޮޑުކުރަން މިއަހަރަށް ފާސްކުރި ދައުލަތުގެ ބަޖެޓުގައި ވެސް ވަނީ ހިމަނައިފައެވެ.