ސަރުކާރު މުވައްޒަފުން އިތުރުގަޑީގައި ކުރާ މަސައްކަތަށް ކުރިންވެސް ހަމަޖެހިފައި އޮންނަ އުސޫލުން އިތުރުގަޑީގެ ފައިސާ ލިބެމުންދާނެ ކަމަށް ފިނޭންސް މިނިސްޓްރީން ބުނެފިއެވެ.
ސަރުކާރު މުވައްޒަފުންނަށް އިތުރުގަޑީގެ ފައިސާ ނުލިބޭނެ ކަމަށް ބުނެ ފަތުރަމުންދާ ހަބަރު ދޮގުކޮށް ފިނޭންސް މިނިސްޓްރީން ބުނީ ސިވިލް ސާވިސް މުވައްޒަފުންނަށް ކުރިންވެސް އިތުރުގަޑީގެ ފައިސާ ލިބެމުންދިޔަ އުސޫލުން އިތުރުގަޑީގެ ފައިސާ ލިބޭނެ ކަމަށެވެ.
ފިނޭންސް މިނިސްޓްރީން ބުނީ ކޮވިޑް19އާ ގުޅިގެން ހަފްތާއަކު 48 ގަޑިއިރު ހަމަވުމުން އިތުރުގަޑީގެ ފައިސާ ދިނުމަށް އަމަލުކުރަމުންދިޔަ އުސޫލަށް އަމަލުކުރުން ހުއްޓާލާފައިވާ ކަމަށެވެ. އަދި މިހާރު ސަރުކާރު މުވައްޒަފުންނަށް އިތުރުގަޑީގެ ފައިސާ ލިބޭނީ ކުރިންވެސް ލިބެމުންދިޔަ އުސޫލުން ކަމަށެވެ.
ދައުލަތުގެ އޮފީސްތަކުން އިތުރު ގަޑީގެ ފައިސާ ދިނުމުގައި ތަފާތު ގޮތްގޮތަށް އަމަލުކުރަމުން ދާތީ އެކަމަށް އޮފީސްތަކުން ކުރާ ހަރަދު އަހަރުން އަހަރަށް ބޮޑުވަމުންދާ ކަމަށް ފިނޭންސުން ބުނެއެވެ. އަދި ވަކިން ހާއްސަކޮށް މިފަދަ ދަތި އުނދަގޫ ދަނޑިވަޅެއްގައި ދައުލަތަށް މާލީ ގޮތުން އެހާ ބޮޑު ދައްޗެއް ކުރިމަތިވެފައިވާއިރު އިތުރު ގަޑީގެ ފައިސާ ދިނުމުގައި އިންސާފުވެރި އަދި ހަމަހަމަ އުސޫލަކުން އަމަލުކުރާނެ ގޮތްތަކެއް ކަނޑައެޅުމަށް މަސައްކަތް ކުރަމުން އަންނަ ކަމަށްވެސް ފިނޭންސުން ބުނެއެވެ.