ރާއްޖެއިން ކޮވިޑް19 އަށް އިތުރު 10 މީހަކު ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ބުނީ ބަންގްލަދޭޝް ހަތް މީހަކާއި ނޭޕާލި ދެ މީހެއްގެ އިތުރުން ދިވެއްސަކު ކޮވިޑް19 އަށް މިއަދު ޕޮޒިޓިވްވެފައިވާ ކަމަށެވެ. މިއާއިއެކު މިހާތަނަށް ރާއްޖެއިން މިބަލި ޖެހުނު މީހުންގެ އަދަދު ވަނީ 2013 އަށް އަރާފައެވެ.
މީގެއިތުރުން މިއަދު ވަނީ މިބަލި ޖެހިފައިވާ މީހުންގެ ތެރެއިން އިތުރު 24 މީހަކު މި ބަލިން ރަނގަޅުވެފައެވެ. މިއާއިއެކު ބަލިން ރަނގަޅުވި މީހުންގެ ޖުމްލަ އަދަދު ވަނީ 1217 އަށް އަރާފައެވެ. އަދި މިހާރު ބައްޔަށް ފަރުވާ ދެމުން އަންނަނީ 786 މީހަކަށެވެ.
ރާއްޖެއިން މިފަހަކަށް އައިސް ބަލިޖެހޭ މީހުންގެ އަދަދަށްވުރެ ބަލިން ރަނގަޅުވާ މީހުންގެ އަދަދު އަންނަނީ އިތުރުވަމުންނެވެ. އެހެންކަމުން ސަރުކާރުން ވެސް ވަނީ އަންނަ ހޯމަ ދުވަހުން ފެށިގެން މާލެ ސަރަހައްދަށް އިއުލާން ކޮށްފައިވާ ލޮކްޑައުން އަށް ބޮޑެތި ލުއިތަކެއް ދިނުމަށް ނިންމާފައެވެ.
ރާއްޖެއިން މިހާތަނަށް މިބަލީގައި 8 މީހަކު ވަނީ މަރުވެފައެވެ.