ކުރީގެ ރައީސް ޑރ. މުހައްމަދު ވަހީދާއި އަނބިކަނބަލުން އިލްހާމް ހުސެއިނާ ދިމާލަށް މީހަކު މަގުމަތިން ދިމާކޮށް، ހުތުރު އެއްޗެހި ގޮވި މައްސަލަ ފުލުހުން ބަލަން ފަށައިފިއެވެ.
ޑރ. ވަހީދު ކުރެއްވި ޓުވީޓެއްގައި ވިދާޅުވީ، އަނބިކަނބަލުންނާއެކު ހެނދުނުގެ ކަސްރަތަށް ނިކުމެވަޑައިގެން އުޅުއްވަނިކޮށް އުސްފަސްގަނޑު ސަރަހައްދުން ދިމާކޮށް ހުތުރު އެއްޗެހި ގޮވީ އެމްޑީޕީ އެކްޓިވިސްޓެއް ކަމަށެވެ.
އަދި އެހުތުރު މަންޒަރު، އެތަނަށް ކަސްރަތު ކުރަން ގޮސް ތިބި އެހެން ރައްޔިތުންނަށް ވެސް ފެނިފައިވާ ކަމަށާއި، މިއަމަލު ކުށްވެރި ކުރާ ކަމަށް ވެސް ކުރީގެ ރައީސްގެ ޓުވީޓުގައި ވިދާޅުވެފައިވެއެވެ.
އެކަމާއި ގުޅިގެން ފުލުހުން ބުނީ ކުރީގެ ރައީސް ޑރ. ވަހީދު ފަތާ ޓްރެކް ސަރަހައްދުގައި އުޅުއްވަނިކޮށް، އެމަނިކުފާނަށް ހުތުރު ބަހުން އެއްޗެހި ކިޔާ ފުރަައްސާރަކުރި މައްސަލައެއް މިއަދު ހެނދުނު 07:07 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
ކުރީގެ ރައީސް މުހައްމަދު ނަޝީދުގެ ވެރިކަން ބަޣާވާތަކުން ވައްޓާލުމުގައި އޭރުގެ އެމަނިކުފާނުގެ ނައިބަކަށް ހުންނެވި ޑރ. ވަހީދަށް ކުރެވުނު ނަމަވެސް ކޯނީ ރިޕޯޓުން ވަނީ އެއީ ބަޣާވާތަކުން ބަދަލުކުރެވުނު ވެރިކަމެއް ނޫން ކަމަށް ކަނޑައަޅާފައެވެ.
ނަމަވެސް އެމްޑީޕީ ސަޕޯޓަރުން އަދިވެސް ޑރ. ވަހީދަށް އެކަމާ ގުޅިގެން ބަހުގެ ހަމަލާތައް ރައްދުކުރެއެވެ. ޓުވީޓާގައި ޑރ. ވަހީދަށް އެކަމާ ގުޅިގެން ފާޑުކިޔައި، ނުވަތަ ބާޣީއެއް ކަމަށް ބުނެ އެއްޗެހި ގޮވާ ފަރާތްތަކުން، ޑރ. ވަހީދު އަންނަނީ ބްލޮކް ކުރައްވަމުންނެވެ