މިދިޔަ އަހަރުގެ މި މުއްދަތާއި އަޅާ ބަލާއިރު މި އަހަރުގެ މި މުއްދަތުގައި ރާއްޖެއަށް މުދާ އެތެރެކުރި މިންވަރު 57 ޕަސެންޓު ދަށަށް ގޮސްފައިވާ ކަމަށް ކަސްޓަމްސްގެ ތަފާސް ހިސާބުތަކުން ދައްކައިފިއެވެ.
މީގެއިތުރިން މިދިޔަ އަހަރުގެ މި މުއްދަތާއި އަޅާ ބަލާއިރު މިދިޔަ އަހަރުގެ މި މުއްދަތުގައި އެކްސްޕޯޓް ވަނީ 73 ދަށަށް ގޮސްފައެވެ. މިކަމުގެ ސަބަބުން ކަސްޓަމްސް އަށް މިދިޔަ އަހަރަށްވުރެ މިއަހަރުގެ މި މުއްދަތުގައި ލިބުނު އާމްދަނީ ވެސް ވަނީ ވަރަށް ބޮޑަށް ދަށަށް ގޮސްފައެވެ.
އިމްޕޯޓް އަދި އެކްސްޕޯޓް އާމްދަނީގެ ގޮތުގައި ކަސްޓަމްސް އަށް މެއި މަހު ލިބިފައި ވަނީ 117 މިލިއަން ރުފިޔާއެވެ. މިއީ މިދިޔަ އަހަރުގެ އެމުއްދަތާ އަޅާބަލާއިރު 59 އިންސައްތައިގެ ދަށްވުމެކެވެ.
ތަފާސް ހިސާބުތައް ދައްކާ ގޮތުން ރާއްޖެއިން އެންމެ ގިނައިން މެއި މަސް ތެރޭގައި މުދާ އިމްޕޯޓު ކޮށްފައިވަނީ އަވަށްޓެރި އިންޑިއާ އިންނެވެ. އެގައުމުން 262 މިލިއަން ރުފިޔާގެ މުދާ އެތެރެ ކޮށްފައިވާއިރު އެއީ މެއި މަހު ރާއްޖެއަށް އިމްޕޯޓު ކޮށްފައިވާ މުދަލުގެ 17 ޕަސެންޓެވެ. ދެވަނަ އަށް އެންމެ ގިނައިން މުދާ އިމްޕޯޓުކުރި ޗައިނާއިން ވަނީ 245 މިލިއަން ރުފިޔާގެ މުދާ އެތެރެ ކޮށްފައެވެ. ތިންވަނަ އަށް 177 މިލިއަން ރުފިޔާގެ މުދަލާއި އެކު މުދާ އިމްޕޯޓު ކޮށްފައިވަނީ ސިންގަޕޫރުންނެވެ.
ރާއްުޖެއިން މިދިޔަ މަހު އެންމެ ގިނައިން އެކްސްޕޯޓު ކޮށްފައިވަނީ އާއްމު ގޮތެއްގައިވެސް ރާއްޖެއިން އެންމެ ގިނައިން އެކްސްޕޯޓުކުރާ ބާވަތް ކަމަށްވާ މަހުގެ ބާވަތްތަކެވެ. އެންމެ ގިނައިން މުދާ އެކްސްޕޯޓު ކޮށްފައިވަނީ ތައިލޭންޑަށެވެ. މެއި މަސް ތެރޭގައި ކޮށްފައިވާ އެކްސްޕޯޓުގެ 46 ޕަސެންޓު ކޮށްފައިވަނީ އެގައުމަށެވެ. އެގައުމަށް 87 މިލިއަން ރުފިޔާގެ މުދާ ވަނީ އެކްސްޕޯޓު ކޮށްފައެވެ.