އަންނަ މަހުގެ އެއްވަނަ ދުވަހު ގދ. މާވަރުލު އެއާޕޯޓަށް ޝެޑިއުލް ދަތުރުތަށް ފަށުމަށް ތައްޔާރުވެފައިވާ ކަމަށް ރީޖަނަލް އެއަޕޯޓްސް އިން ބުނެފިއެވެ.
މި އެއާޕޯޓަކީ މުޅިން އަލަށް ހިދުމަތް ދިނުމަށް ފަށާ އެއާޕޯޓެކެވެ. މި އެއާޕޯޓަށް މިދިޔަ މާޗު މަހުގެ ތެރޭގައި ޓެސްޓު ފްލައިޓުވެސް ވަނީ ޖައްސާފައެވެ. އެހެންނަމަވެސް އެއާޕޯޓަށް ޝެޑިއުލް ދަތުރުތައް ކުރުން ނުފަށާ އޮތީ ކޮވިޑް19 ގެ ސަބަބުންނެވެ.
ނަމަވެސް ރީޖަނަލް އެއާޕޯޓްސް އިން މިހާރު ބުނަމުން އަންނަނީ އަންނަ މަހުގެ އެއްވަނަ ދުވަހު މާވަރުލު އެއާޕޯޓަށް ޝެޑިއުލް ދަތުރުތައް ފެށުމަށް ތައްޔާރުވެފައިވާ ކަމަށެވެ. އަދި އެކަމަށްޓަކައި އެ އެއާޕޯޓާއި އެއާޕޯޓަށް ބޭނުންވާ މުވައްޒަފުންވެސް ތިބީ ތައްޔާރަށް ކަމަށެވެ.
ގދ.މާވަރުލުގައި އެއާޕޯޓު ތަރައްގީކުރުމުގެ މަސައްކަތް ފެށީ 2018 ވަނަ އަހަރުގެ ޖޫން މަހުގެ ތެރޭގައެވެ. އެ އެއާޕޯޓްގެ ރަންވޭ އާއި ޓެކްސީވޭ އަދި ފަސިންޖާ ޖެޓީގެ މަސައްކަތް 57 މިލިއަން ރުފިޔާ ހަރަދުކޮށްގެން ކުރީ އެމްޓީސީސީންނެވެ.
މާވަރުލު އެއާޕޯޓް ހުޅުވުމުން ހުވަދު އަތޮޅުގައި ތިން އެއާޕޯޓް އޮންނާނެ އެވެ.