ޑިރެކްޓަރު ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު އާލާސްކަންފުޅާ އުޅުއްވާތީ އިއްޔެ ހޮސްޕިޓަލުގައި އެޑްމިޓުކޮށްފިއެވެ.
ކޮވިޑް19 އަށް ސަރުކާރުން ކަނޑައަޅާފައިވާ ތަރުޖަމާން މުހައްމަދު މަބްރޫކް އަޒީޒް ބައެއް މީޑިއާތަކަށް ވިދާޅުވީ މައިމޫނާ އިއްޔެ އެޑްމިޓުކުރި ކުރި ކަމަށެވެ. ނަމަވެސް މިހާރު އެކަމަނާ ދޫކޮށްލާފައިވާ ކަމަށާއި ހާލުވެސް ރަނގަޅު ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވީ މައިމޫނާ އެޑްމިޓު ކުރީ ކޮވިޑް19 އާއި ގުޅުންހުރި އެއްވެސް ކަމެއްގައި ނޫން ކަމަށެވެ. އެޑްމިޓު ކުރެއްވި ސީދާ ސަބަބު މަބްރޫކް ހާމައެއް ނުކުރަވައެވެ.
އާއްމު ސިއްހަތުގެ ގާނޫނުގެ ދަށުން މައިމޫނާ އަކީ ބޮޑެތި ބާރުތަކެއް ލިބިދީފައިވާ ބޭފުޅެކެވެ. އެގޮތުން ކޮވިޑް19 އާއި ގުޅިގެން އެކަމަނާ އަންނަނީ އެބަލި ފެތުރުން ހުއްޓުވުމަށް ގާނޫނުން އެކަމަނާ އަށް ލިބިދީފައިވާ ގިނަ ބާރުތަކެއް ބޭނުން ކުރައްވަމުންނެވެ.
ރާއްޖެއިން ކޮވިޑް19 އަށް ޕޮޒިޓިވްވި މީހުންގެ އަދަދު މިހާރު ވަނީ 2150 އަށް އަރާފައެވެ. މީގެތެރެއިން ފަރުވާ ދެމުން މިހާރު އަންނަނީ 371 މީހަކަށެވެ.
ބަލިން ރަނގަޅުވި މީހުންގެ ޖުމްލަ އަދަދު ވަނީ 1769 އަށް އަރާފައެވެ.
މި ބަލީގައި ރާއްޖެއިން އަށް މީހަކު ވަނީ މަރުވެފައެވެ. އޭގެތެރޭގައި ހިމެނެނީ ބަންގްލަދޭޝްގެ ހަތަރު މީހުންނާއި ހަތަރު ދިވެހިންނެވެ.