ކްރިމިނަލް ކޯޓުގެ މުވައްޒަފަކު ކޮވިޑް19 އަށް ޕޮޒިޓިވްވުމާއި ގުޅިގެން އެ ކޯޓު ޑިސްއިންފެކްޓު ކުރުމަށްޓަކައި ޝަރީއަތްތައް މެދުކަނޑާލައިފިއެވެ.
ޝަރީއަތްތައް މެދުކަނޑާލި ނަމަވެސް ބަންދުގެ މުއްދަތު އިތުރު ކުރުމާއި ކޯޓު އަމުރު ނެރުމުގެ ކަންކަން ފަނޑިޔާރުންނާއި އެ ކޯޓުގެ މުވައްޒަފުން ގޭގައި ތިބިގެން ކުރަމުން ގެންދާނެ ކަމަށް އެ ކޯޓުން މިއަދު ނެރުނު ބަޔާނެއްގައި ބުންޏެވެ.
ކްރިމިނަލް ކޯޓުން ބުނީ ކޮވިޑް19 އަށް ޕޮޒިޓިވްވި އެ ކޯޓުގެ މުވައްޒަފާއި ބައްދަލުވި އެހެން މުވައްޒަފުން މިހާރު ފާހަގަކުރެވިފައިވާ ކަމަށެވެ. މުވައްޒަފަކު ކޮވިޑަށް ޕޮޒިޓިވްވި ނަމަވެސް ގިނަ މުވައްޒަފުން ކަރަންޓީނަށް ދާން ނުޖެހޭނެ ގޮތަށް ކޯޓުގެ މަސައްކަތްތައް ތަރުތީބު ކުރެވިފައިވާ ކަމަށްވެސް އެ ކޯޓުން ބުނެއެވެ.
މިހާތަނަށް އެ ކޯޓުން މަސައްކަތް ކުރަމުން ދިޔައީ ދެ ދަންފަޅި އަކަށް ބަހާލައިގެންނެވެ. ދެ ދަންފަޅީގައިވެސް ފަނޑިޔާރުންނާއި މުވައްޒަފުން މަސައްކަތަށް ނިކުންނައިރު އެޗްޕީއޭގެ ގައިޑްލައިންތަކާއި އެއްގޮތަށް މަސައްކަތްތައް ކުރަމުން އަންނަ ކަމަށް ކްރިމިނަލް ކޯޓުން ބުންޏެވެ.
ކްރިމިނަލް ކޯޓުން ކޮވިޑަށް ޕޮޒިޓިވްވީ އެކޯޓުގެ، ކޯޓު އޮފިސަރެކެވެ. އިއްޔެ މާލެ ޖަލުގެ ކަރެކްޝަނަލް ސާވިސްގެ އޮފިސަރެއްވެސް ވަނީ ކޮވިޑް19 އަށް ޕޮޒިޓިވްވެފައެވެ. އަދި ދާދިފަހުން ރައްޔިތުން މަޖިލީހުގެ މުވައްޒަފަކުވެސް ވަނީ ކޮވިޑް19 އަށް ޕޮޒިޓިވްވެފައެވެ.