ކުރީގެ ރައީސް އަބްދުﷲ ޔާމީން ޖަލުގައި އޮތް އިރު ކުރީގެ ނައިބު ރައީސާއި ކުރީގެ އެމްއެމްޕީއާރުސީގެ މެނޭޖިން ޑިރެކްޓަރ އަބްދުﷲ ޒިޔަތު ގޭގައި އޮތުން އިންސާފުވެރިތޯ ޔާމީންގެ ވަކީލް ޑރ. ޖަމީލް ސުވާލު އުފައްދައިފިއެވެ
އެއް ކުށެއް ސާބިތުވެ ތިބި ތިން ބޭފުޅުންގެ ތެރެއިން ރައީސް ޔާމީން އެކަނި ޖަލުގައި އޮތުމަކީ އިންސާފުތޯ ނުވަތަ ބަދަލުހިފުންތޯ ޖަމީލް ސުވާލު އުފައްދާފައިވެއެވެ.
އަދި ސިޔާސީ ހާލަތަށް ފެތޭ ގޮތަށް އަމަލުކުރާ ޕްރޮސެކިއުޓާ ޖެނެރަލްއަކަށް ބަރޯސާ ނުވުމަށް އެހެން މުއައްސަސާތަކަށް ގޮވާލައި، ޕީޖީ ޝަމީމަށް ވެސް ޖަމީލް ވަނީ ފާޑުކިޔާފައެވެ.
މިސަރުކާރުން ކޮވިޑް-19 އާ ގުޅިގެން ހިންގާ ކޮރަޕްޝަންގެ އަމަލުތައް ނުބަލާ މައްސަލާގައި ވެސް ޖަމީލް ވަނީ އޭސީސީ އަށް ބަހުގެ ހަމަލާތަކެއް ފޮނުވާފައެވެ.
"އެއްބިލިއަން ޚަރަދު ކުރިއިރު ބޮޑެތި ޖަރީމާތައް ހިންގާފައިވޭ. ވެންޓިލޭޓަރު ގެނައުމުގެ ނަމުގައި ދެމިލިއަން ޑޮލަރު ވުޖޫދުގައި ނެތް ކުންފުންޏަކުން ނެގިއިރު ފުލުހުން އަދި އޭސީސީ ކޮބައިތޯ؟"
ސަރުކާރުން އެމްއެމްޕީއާރުސީގެ މައްސަލަ ނުބަލާތީ ބައެއް ޖަމިއްޔާ ޖަމާއަތްތަކުން އަންނަނީ ފާޑުކިޔަމުންނެވެ. އެމްއެމްޕީއާރުސީ ބޮޑު ޚިޔާނާތުގައި މިސަރުކާރުގެ އިސް ފަރާތްތަކުން ވެސް ހިމެނޭއިރު އެފަރާތްތަކުގެ މައްސަލަތައް ނުބަލަން އަންގާފައިވާ ކަމަށް ދެކެވުނު ވާހަކަތައް ޕީޖީ ވަނީ ދާދި ފަހުން ދޮގުކޮށްފައެވެ.