އިސްލާމިކް މިނިސްޓްރީން މިއަހަރުގެ ފިތުރު ޒަކާތް ބަހާފައި ވާނީ ސައްހަ ލިސްޓަކަށް ނޫން ކަމަށް ބުނެ ދައްކަމުން ދިޔަ ވާހަކަތައް އިސްލާމިކް މިނިސްޓަރު ޑރ. އަހުމަދު ޒާހިރު ދޮގު ކުރައްވައިފިއެވެ.
ރައްޔިތުން މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ ޒަކާތް ބަހާފައިވަނީ މިދިޔަ އަހަރުގެ އޮކްޓޫބަރު މަހުގެ ތެރޭގައި އެކުލަވާލާފައިވާ ލިސްޓަކަށް ކަމަށެވެ. އެކަން އެގޮތަށް ކުރަން ޖެހުނީ ހާލަތަށް ބަލާފައި ކަމަށްވެސް މިނިސްޓަރު ޒާހިރު ވިދާޅުވިއެވެ.
މިނިސްޓަރު ވިދާޅުވީ، ޒަކާތް ދޫކުރާ ފަގީރުންގެ ލިސްޓު އެކުލަވައިލަނީ ރަށްރަށަށް ފޮނުވައި ފޯމުތަކެއް ފުރުމަށް ފަހުގައި ކަމަށެވެ. އަދި މި އަހަރުގެ ރޯދަ މަސް އައިއިރު އެ ގޮތަށް ލިސްޓު އެކުލަވައިލެވެން ނެތް ކަމަށް ފެނުމުން ލިސްޓު އަޕްޑޭޓް ނުކުރަން ނިންމީ ކަމަށެވެ.
ޒާހިރު ވިދާޅުވީ އެހެން ދިމާވި ނަމަވެސް ޒަކާތު ފައިސާ ދޫކޮށްފައި ވަނީ މިދިޔަ އަހަރު އަޕްޑޭޓް ކުރި އެންމެ ފަހު ލިސްޓަށް ކަމަށާއި ޒަކާތް ބެހުން އޮންނަނީ އެންމެ ހައްގުވެރިންނަށް ކަމަށްވާއިރު މި ހާލަތުގައި އެކުލަވައިލެވޭނެ އެންމެ އަޑްޕޭޓް ލިސްޓަށް ޒަކާތް ދޫކުރެވިފައިވާ ކަމަށް ދެކެވަޑައިގަންނަވާ ކަމަށެވެ.
މިއަހަރު 156،740 މީހުން ފިތުރު ޒަކާތް ދެއްކިއެވެ. އަދި ޒަކާތުގެ ގޮތުގައި 6،649،697 ރުފިޔާ ލިބިފައިވެއެވެ.