އަންހެނުންގެ ހައްގުތައް ދިފާއުކޮށް "އުތެމަ" ޖަމިއްޔާ އިން ނެރުނު ރިޕޯޓަކާ ގުޅިގެން އެ ޖަމިއްޔާ ވެސް އުވާލަން ބައެއް ދިވެހިން ގޮވަން ފަށައިފިއެވެ.
އުތެމަ ޖަމިއްޔާ އުވާލަން ގޮވާލާފައިވަނީ މޯލްޑިވިއަން ޑިމޮކްރަސީ ނެޓްވޯކް(އެމްޑީއެން) އިން ނެރުނު ދީނާ ނުގުޅޭ ރިޕޯޓު ދިފާއުކޮށް ވާހަކަ ދެއްކުމާ ގުޅިގެންނެވެ. އަދި އެ ޖަމިއްޔާއިން ނެރުނު ރިޕޯޓުގައި ވެސް ދީނާ ނުގުޅޭ ވާހަކަތައް ހިމަނާފައިވާ ކަމަށް ބުނެއެވެ.
މިރިޕޯޓު ތައްޔާރުކުރުމަށް ވެސް ފަނޑުކޮށްފައިވަނީ އެމްޑީއެންގެ ރިޕޯޓަށް ފަންޑުކުރި 'ކެނެޑާ ފަންޑް ފޯ ލޯކަލް އިނިޝިއޭޓިވް' އެވެ. މި ރިޕޯޓުގައި، އެމްޑީއެންގެ ރިޕޯޓު ވަރަށް ގިނަ ބަޔަކު ކުށްވެރިކުރި ކަން ފާހަގަކޮށް، އެއީ ރާއްޖޭގައި ހައްދުފަހަނަޅާފައިވާ ފިކުރު ފެތުރިފައި އޮތް މިންވަރު އަންގައިދޭ ކަމެއް ކަމަށް ދޭހަވާ ގޮތަށް ލިޔެފައިވެއެވެ.
އަދި ރާއްޖޭގައި އަންހެނުންނާއި، ކުޑަކުދިންނަށް ގިނަ ގުނަ ހުރަސްތަކާ ކުރިމަތިލާން ޖެހޭ ކަމަށާއި އެގޮތުން ޅަ އަންހެން ކުދިން އުމުރު ނުފުރެނީސް ކައިވެނި ކުރުވާ ކަން ފަދަ މައްސަލަތައް ފާހަަގަކޮށްފައިވެއެވެ.
އުތެމަ އުވާލަން ގޮވާލާފައިވާ ޖަމިއްޔާތަކުގެ ތެރޭގައި ސަލަފް ޖަމިއްޔާ ހިމެނެއެވެ. ސަލަފުން ވަނީ އުތަމަ އަކީ އެމްޑީއެންގެ ފިކުރު ފަތުރަން އުފެދިފައި އޮންނަ ޖަމިއްޔާ އެއް ކަމަށާއި ލާދީނީ ފިކުރު ރާއްޖޭގައި ފަތުރަން ފުރުސަތު ނުދިނުމަށް ގޮވާލާފައެވެ.