ރ. މަޑުއްވަރީގައި އަނެއްކާވެސް ފުލުހުންނާއި ސިފައިން އޮޕަރޭޝަނެއް ފަށައިފިއެވެ.
މިދިޔަ އަހަރުގެ ޑިސެމްބަރު މަހުގައި ވެސް ފުލުހުންނާއި ސިފައިން ވަނީ މަޑުއްވަރީގައި ހާއްސަ އޮޕަރޭޝަނެއް ފަށާފައެވެ. އަދި އެ އޮޕަރޭޝަންގައި ދީނީ ހަރުކަށި ފިކުރަށް ނިސްބަތްވާ ބަޔަކު ވަނީ ހައްޔަރުވެސް ކޮށްފައެވެ.
ނަމަވެސް މިފަހަރު ކުރިޔަށް ގެންދާ އޮޕަރޭޝަންގެ ސީދާ މައުލޫމާތެއް ކަމާ ގުޅުންހުރި އެއްވެސް އިދާރާއަކުން އަދި ދީފައެއް ނުވެއެވެ. "ސަން" އޮންލައިންގައި ބުނެފައިވާ ގޮތުގައި ފުލުހުންނާއި ސިފައިން އެ ރަށުގައި ހިންގާ އޮޕަރޭޝަންގައި ފާސްކުރަމުން ދަނީ މީގެ ކުރިން ވެސް ހަރުކަށި ފިކުރުގެ މީހުންނާ ދެކޮޅަށް އެ ރަށުގައި ހިންގި އޮޕަރޭޝަނެއްގެ ތެރެއިން ފާސްކުރި ގެއެއް ކަމަށެވެ.
ރާއްޖޭގައި ދީނީ ހަރުކަށި ފިކުރަށް ތާއީދު ކުރާ މީހުންގެ މައްސަލަތައް ވަނީ ވަރަށް ބޮޑަށް ފެންމަތިވެފައެވެ. އަދި އެ މީހުން އަމިއްލަ އަށް ދީނުގެ ހުކުމްތައް ހަދާ އެމީހުންގެ އަނބިންނާއި ދަރިންނަށް ދޭންޖެހޭ ހައްގުތައް ދެމުން ނުދާކަން ވަނީ ތަހުގީގުތަކަށް ފާހަގަކުރެވިފައެވެ.