ކުޑަކުއްޖަކަށް ޖިންސީ ގޯނާކުރި މީހަކު ހައްޔަރު ކުރުމަށްފަހު އެމީހާ އާއި ދެކޮޅަށް އެވަރަށް ހެއްކާއި ގަރީނާ ލިބިފައި ހުއްޓާވެސް އެމީހާގެ މައްޗަށް ތުހުމަތު ކުރާ ކުށަކީ ބޮޑު ކުށަކަށް ނުވާތީ އޭނާ ބަންދުގައި ބަހައްޓަން އިތުރަށް ނުފެންނަ ކަމަށް ކަނޑައަޅާ އެމީހާ ދޫކޮށްލައިފިއެވެ.
އެމީހާ އަކީ މިދިޔަ މަހުގެ 28ވަނަ ދުވަހު ހައްޔަރުކުރި މީހެކެވެ. އަދި އޭނާގެ ބަންދަށް 29 މެއި ގައި ވަނީ 15 ދުވަސް ޖަހާދީފައެވެ. އޭގެ ފަހުން އެމީހާގެ ބަންދުގެ މުއްދަތު އިތުރު ކޮށްދިނުމަށް ޖިނާއީ އިޖުރާއަތުގެ ގާނޫނުގެ ދަށުން ފުލުހުން އެދުނު ނަމަވެސް ކްރިމިނަލް ކޯޓުން ޖަހާ ދީފައި ވަނީ 10 ދުވަހެވެ.
އޭނާ ޝަރީއަތް ނިމެންދެން ބަންދުނުކޮށް، ވަކި މުއްދަތަކަށް ބަންދުގައި ބެހެއްޓުމަށް ކުރި އަމުރު އެއްވެސް ފަރާތަކުން އިސްތިއުނާފުކޮށްފައި ނުވާކަން ކްރިމިނަަލް ކޯޓުގެ އަމުރުން އެނގެއެވެ. ނަމަވެސް އޭނާ އިތުރަށް ބަންދުގައި ބެހެއްޓެން ނެތުމުން، ކްރިމިނަލް ކޯޓުން ވަނީ އޭނާ ދޫކޮށްލައިފައެވެ.
އެމީހާ ދޫކޮށްލުމުގެ އަމުރުގައި ބުނެފައިވަނީ އެމީހާގެ މައްޗަށް ތުހުމަތު ކުރެވޭ ކުށަކީ ޖިނާއީ އިޖުރާއަތުގެ ގާނޫނުގެ ދަށުން ބޮޑެތި ކުށްތަކުގެ ތެރޭގައި ހިމެނޭ ކުށްތަކެއް ކަމުގައި ނުވާ ކަމަށެވެ.