މޯލްޑިވްސް ކަރެކްޝަނަލް ސާވިސްއިން ބަލަހައްޓަމުންދާ ޖަލުތަކުގެ ޖާގައާ ނުބައްދަލު ވަރަށް މީހުން އެ ޖަލުތަކުގައި އެބަ ތިބި ކަމަށް ހޯމް މިނިސްޓަރ ޝެއިޚް އިމްރާން އަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގައި މެމްބަރުންގެ ސުވާލުތަކަށް ޖަވާބު ދެއްވަމުން އިމްރާން ވިދާޅުވީ، ކަރެކްޝަނުން ބަލަހައްޓަމުން ގެންދާ ހަތަރު ޖަލުތަކުގައި ބަންދުކުރެވޭނެ ޖާގައަކީ 1،300 ގައިދީން ކަމަށެވެ. ނަމަވެސް މިވަގުތުވެސް 1،800 ގައިދީން ބަންދުކުރެވިފައިވާކަން އިމްރާން ފާހަގަ ކުރެއްވިއެވެ.
އިމްރާން ވިދާޅުވީ ޖަލުތަކުގެ އާބާދީ މަދުކުރުމަށް ރިހެބިލިޓޭޝަންގެ މަސައްކަތް މިހާރަށް ވުރެ ރަނގަޅު ކުރުމަށް ސަރުކާރުން މަސައްކަތް ކުރަމުންދާ ކަމަށެވެ. އަދި އިތުރު ޖަލުތައް އެޅުމަށް ވެސް މަސައްކަތް ކުރާ ކަމަށް މިނިސްޓަރު ވިދާޅުވިއެވެ.
ޖަލުގައި ބޮޑެތި ކުށްތަށް ކޮށްގެން ތިބޭ ކުށްވެރިންނާއި އާދައިގެ ކުށްވެރިން އެއްކޮށް ބައިތިއްބާ ކަން ވެސް މިނިސްޓަރު ފާހަގަކުރެއްވިއެވެ. އޭގެ ތެރޭގައި، ހައްދުފަހަނަޅާފައިވާ ފިކުރުތަށް ފެތުރުމުގެ ކުށުގައި ހައްޔަރުކުރާ ފަރާތްތައް ހިމެނޭ ކަމަށާއި، މިހާރު އެފަދަ ކުށްވެރިން އެހެން ކުށްވެރިންނާ ވަކިކޮށް ބަންދުކުރެވިފައިވާނެ ކަމަށް އިމްރާން ވިދާޅުވިއެވެ.
އަދި އެފަދަ ކުށްވެރިން ބަންދުކުރުމަށް ވަކި ޚާއްސަ ޔުނިޓެއް އަޅަމުން އަންނަ ކަމަށް ވެސް މަޖިލީހަށް މައުލޫމާތު ދެއްވަމުން، އިމްރާން ވިދާޅުވިއެވެ. މިހާރު މަސައްކަތް ކުރިއަށްދާ ގޮތުން ކުރިއަށް އޮތް ދޮޅު މަސް ދުވަސް ތެރޭ އެ ޔުނިޓު ނިންމާލެވި، ކުށްވެރިން ބަދަލުކުރެވޭނެ ކަމަށް ވެސް އޭނާ ވިދާޅުވިއެވެ.