ހޯމަ ދުވަހު މަޖިލިސް އިދާރާ ކުރިމަތީގައި ބޭއްވުނު މުޒާހަރާ ރޫޅާލުމުގައި ފުލުހުން އަމަލުކުރި ގޮތާމެދު ހޯމް މިނިސްޓަރު ހިތްހަމަނުޖެހިވަޑައިގަތް ކަން މަޖިލީހުގައި ހާމަކުރައްވައިފިއެވެ.
މަޖިލީހުގެ މަސައްކަތާ މެދު ހިތްހަމަނުޖެހި "ނަވާނަވައި" އިން ބޭއްވި މުޒާހަރާ ހުއްޓުވުމަށް ފުލުހުން ވަނީ ބާރުގެ ބޭނުންކޮށްގެން ބައިވެރިން ދުރަށް ޖައްސާފައެވެ.
އެ މައްސަލައާ ގުޅިގެން މިއަދު ހޯމް މިނިސްޓަރު މަޖިލީހަށް ވަޑައިގެންނެވުމުން، ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވަނީ ސުވާލު ކޮށްފައެވެ. ޖަވާބު ދެއްވަމުން އިމްރާން ވިދާޅުވީ، މުޒާހަރާ ރޫޅާލުމުގައި ފުލުހުން އަމަލު ކުރިގޮތް އެންމެ ރަނގަޅު ނޫންކަމަށް ދެކިވަޑައިގަންނަވާ ކަމަށް ވިދާޅުވެފައެވެ.
އަދި ޣައިރު ގާނޫނީ އެއްވުންތައް ފުލުހުން ރޫޅާލާގޮތް ވަރަށް ގާތުން ބަލަމުން އަންނަ ކަމަށް ވެސް މިނިސްޓަރު ވިދާޅުވިއެވެ. އެފަދަ ކަންކަން ރަނގަޅުވުމަށް އެދޭ ކަމަށް އިމްރާން ވިދާޅުވި ނަމަވެސް ފިޔަވަޅެއް އަޅުއްވާނެ ކަމެއް ވިދާޅުވެފައެއް ނުވެއެވެ.
ހޯމަ ދުވަހުގެ މުޒާހަރާގައި ބައިވެރިވީ މަދު ބަޔަކު ނަމަވެސް ގިނަ ފުލުހުންތަކެއް ވަނީ މުޒާހަރާ ރޫޅާލުމަށް މަސައްކަތް ކޮށްފައެވެ. މުޒާހަރާގެ ބައިވެރިން ފުލުހުންގެ ބަހަށް އެތަނުން ދުރު ނުވުމުން ގަދަ ބާރުން ފުލުހުން ވަދެ ބައިވެރިން ވަނީ އެހިސާބުން ދުރުކޮށްފައެވެ.
ނަމަވެސް މުޒާހަރާގެ ބައިވެރިން ވަނީ ފުލުހުން އެއްވެ އުޅުމުގެ މިނިވަންކަމަށް ހުރަސް އެޅި ކަމަށް ބުނެ ސަރުކާރަށާއި ފުލުހަށް ފާޑުކިޔާފައެވެ.
އެހާދިސާ ހިނގާދިޔަ ގޮތާ ގުޅޭގޮތުން އޭސީޕީ ފައިރޫޝް ވިދާޅުވީ، ކޮވިޑް-19 އާ ގުޅިގެން ބޭރަށް ނިކުތުން ހިފަހައްޓާފައި އޮތް އިރު، އެޗްޕީއޭ އިން އަންގާފައިވާ އެންގުމާ ޚިލާފު ނުވާ ގޮތަށް އެއްވެ އުޅުމާއި ޚިޔާލު ފާޅުކުރުމުގެ މިނިވަންކަން ކޮންމެ ރައްޔިތަކަށް ވެސް ލިބިގެންވާ ކަމަށެވެ.
ނަމަވެސް މިދަނޑިވަޅަކީ ބޭރަށް ނިކުމެ މުޒާހަރާ ކުރަން އެންމެ އެކަށީގެންވާ ދަނޑިވަޅަކަށް ނުވާތީ ގޭގައި ތިބުމަށް އިލްތިމާސް ކުރައްވާފައެވެ.