ރާއްޖެއިން ކޮވިޑް19 އަށް ޕޮޒިޓިވްވި މީހުންގެ ތެރެއިން ތިން މީހެއްގެ ހާލު ސީރިއަސްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކޮށްފައިވާ ޓްވީޓެއްގައި މިއަދު ބުނީ އެ ތިން މީހުން ދަރުމަވަންތަ ހޮސްޕިޓަލަށް ބަދަލުކުރީ އިތުރު ފަރުވާ އަށް ކަމަށެވެ، އަދި ބުނީ އޭގެތެރެއިން ދެ މީހަކަށް ފަރުވާ ދެމުން ދަނީ ވެސް ވެންޓިލޭޓަރުގެ އެހީގައި ކަމަށެވެ. އިތުރު ތަފްސީލެއް ހާމައެއް ނުކުރެއެވެ. އެގޮތުން ހާލު ސީރިއަސްވި މީހުންނަކީ ކޮން ގައުމެއްގެ ބައެއް ކަމެއް ވެސް އަދި ކިތައް އަހަރުގެ ބައެއް ކަމެއްވެސް ހާމައެއް ނުކުރެއެވެ.
އިއްޔެވެސް ރާއްޖެއިން 19 މީހަކު ކޮވިޑަށް ޕޮޒިޓިވްވިއެވެ. މިއާއި އެކުގައި މިހާތަނަށް ރާއްޖެއިން މި ބައްޔަށް ޕޮޒިޓިވްވި މީހުންގެ އަދަދު ވަނީ 2324އެވެ. މީގެއިތުރުން އިއްޔެ ބަލިން ރަނގަޅުވި 36 މީހުންނާއި އެކު މުޅި ޖުމްލަ ބަލިން ރަނގަޅުވި މީހުންގެ އަދަދު ވަނީ 1911 އަށް އަރާފައެވެ. މިހާތަނަށް މި ބައްޔަށް ފަރުވާ ދެމުން ދަނީ 400 މީހަކަށެވެ.
މިބަލީގައި މިހާތަނަށް 8 މީހަކު ވަނީ މަރުވެފައެވެ.