މަސްތުވާތަކެތީގެ އޮޕަރޭޝަނެއްގައި އައްޑޫ ސިޓީން 5.5 ކިލޯގެ މަސްތުވާތަކެތި އަތުލައިގެންފިއެވެ.
ކޮމިޝަނަރު އޮފް ޕޮލިސް މުހައްމަދު ހަމީދު ކުރެއްވި ޓްވީޓެއްގައި ވިދާޅުވީ އެ އޮޕަރޭޝަނަކީ ފުލުހުންނާއި އައްޑޫ ސިޓީގެ އިންޓެލް ފުލުހުން އަދި ސިފައިން ރޭ ކުރިއަށް ގެންދިޔަ އޮޕަރޭޝަނެއް ކަމަށެވެ. އެ އޮަޕރޭޝަންގައި 5.5 ކިލޯގެ ހެރޮއިން އަތުލައިގަނެ، ހަ މީހަކު ހައްޔަރު ކޮށްފައިވާ ކަމަށްވެސް ކޮމިޝަނަރު އޮފް ޕޮލިސް ވިދާޅުވިއެވެ.
ނަމަވެސް އެ އޮޕަރޭޝަނާއި ގުޅޭ އިތުރު މައުލޫމާތެއް ހާމައެއް ނުކުރެއެވެ. އަދި ހައްޔަރުކުރި މީހުންގެ ވަނަވަރެއްވެސް ހާމައެއް ނުކުރެއެވެ.
ދާދިފަހުން ޑްރަގް އެންފޯސްމަންޓް ޑިޕާޓްމަންޓާއި ފުލުހުންގެ އިންޓެލިޖެންސް ގުޅިގެން ހުޅުމާލޭގައި ހިންގި ތިން އޮޕަރޭޝަނެއްގައި ހަތް މީހަކު ވަނީ ހައްޔަރުކޮށްފައިވެއެވެ. މި މަހުގެ 25 ވަނަ ދުވަހު ހިންގި ތިން އޮޕަރޭޝަނަކީވެސް ފުލުހުންގެ އިންޓެލިޖެންސަށް ލިބުނު މައުލޫމާތުތަކަކާ ގުޅިގެން ހިންގި ތިން އޮޕަރޭޝަން ކަމަށް ފުލުހުން ބުންޏެވެ.