ޕްރިމިއާ ލީގުގައި ރޭ މެންޗެސްޓާ ޔުނައިޓެޑާއި ބްރައިޓަން ބައްދަލުކުރި މެޗު ފަސޭހަކަމާއެކު، 0-3 އިން ޔުނައިޓެޑު ކާމިޔާބުކޮށްފިއެވެ.
މުޅި މެޗުގައި ވެސް ޔުނައިޓެޑު ގަދައަށް ކުޅުނު މިމެޗުގެ ފުރަތަމަ ލަނޑު، 16 ވަނަ މިނެޓުގައި ޖަހާފައިވަނީ ޒުވާން ފޯވާޑް މޭސަން ގްރީންވުޑެވެ. ޔުނައިޓެޑުގެ ލީޑު ފުޅާކުރީ 30 ވަނަ މިނެޓުގައި ބްރޫނޯ ފަނާންޑޭޒް ޖެހި ގޯލަކުންނެވެ.
ބްރޫނޯގެ ގޯލުގެ ސައްހަ ކަމާ މެދު ބައެއް ފަރާތްތަކުން ސުވާލު އުފައްދާފައިވަނީ ގޯލު ޖެހުމުގެ ކުރިން ލޫކް ޝޯ އޮފްސައިޑު ވި ކަމަށާއި އޭގެ ކުރިން ބޯޅަ ބޭރު ވެފައި އޮތްވާ ކުޅުނު ކަމުގެ ތުހުމަތުގައެވެ. ވީޑިއޯ އެސިސްޓެންޓު ރެފްރީ ވެސް ވަނީ މިގޯލު ސައްހަތޯ ބެލުމަށް ބޭނުންކޮށްފައެވެ. ވީއޭއާރުން ނިންމީ ގޯލު ރަނގަޅު ކަމަށެވެ.
ދެވަނަ ހާފުގައި ބްރައިޓަން އިން ކުޅުން ރަނގަޅުކޮށް ޔުނައިޓެޑު ގޯލަށް ހަމަލާ ކުރަން މަސައްކަތް ފެށިއެވެ. ނަމަވެސް ޔުނައިޓެޑުން ވަނީ ކައުންޓާ އެޓޭކުގައި އިތުރު ގޯލަކާ އެކު ނަތީޖާ 0-3 އަށް ބަދަލުކޮށްފައެވެ.
މިލަނޑު ވެސް ޖަހާފައިވަނީ ގްރީންވުޑްގެ ހުރަހަކުން ބްރޫނޯ ފަނާންޑޭޒްއެވެ. މިއީ ބްރޫނޯގެ 5 ވަނަ ލީގު ގޯލެވެ.
ރޭގެ މޮޅާއެކު ޔުނައިޓެޑް ގަދަ ހަތަރަކަށް ކުރަމުން އަންނަ އުއްމީދު ވަނީ އިތުރުކޮށްފައެވެ. އެގޮތުން ހަތަރު ވަނާގައި އޮތް ޗެލްސީއާ ދެމެދު އެއް ޕޮއިންޓަށް ކައިރިކޮށްފައިވާއިރު ތިންވަނައިގައި އޮތް ލެސްޓާއާ ތިން ޕޮއިންޓަށް ވަނީ ކައިރިވެފައެވެ.
ނަމަވެސް ހަ ވަނައިގައި އޮތް ވުލްވްސް ވެސް އޮތީ ގަދަ ހަތަރެއްގެ ޖާގައަކަށް ޔުނައިޓެޑު ފަހަތުގައި ވިއްދާލާފައެވެ. ވުލްވްސްއަށް ވެސް ޔުނައިޓެޑާ އެއްވަރަށް ޕޮއިންޓު ލިބިފައިވި ނަމަވެސް ގޯލުން ގަދަވަނީ ޔުނައިޓެޑެވެ.