ޖިންސީ ގޯނާއާއި ފުރައްސާރަ އަދި ރޭޕްގެ މައްސަލައަށް ރާއްޖޭގައި ނުރައްކާތެރި އަދަދަކަށް ފެންމަތިވަމުން އަންނަ މިދަނޑިވަޅުގައި އިދާރާތައް ޒިންމާދާރު ކުރުވުމަށް އައްޑޫގައި މާދަމާ އެއްވުމެއް ބާއްވަން ނިންމައިފިއެވެ.
މިއެއްވުން ބާއްވާނީ ހިތަދޫ ސިޓީ ސްކެއާ ކައިރީ، މާދަމާ ހަވީރު 16:00 ގައެވެ.
ސަފާރީއެއްގައި ކެންޔާ އަންހެނަކަށް ޖިންސީ ގޯނާ ކުރުމުގެ ސަބަބުން ކަނޑަށް ފުންމާލައި، އެތަނުން ފުލުހުން ދެމީހަކު ހައްޔަރުކުރުމަށް ފަހު ދޫކޮށްލި މައްސަލާގައި ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.
ކެންޔާ އަންހެން މީހާ ކިޔާދިން ގޮތުގައި، އެތަނުން އެކަކު އޭނާގެ ޖިންސީ ގުނަވަނުގައި އޭނާގެ ނުގަބޫލުގައި އަތްލި ކަމަށާއި، ކަނޑަށް ފުންމާލީ އެމީހުންގެ ކިބައިން ސަލާމަތްވުމަށް ކަމަށާއި ފުލުހުންގެ އެހީތެރިކަމަށް އެދުނީވެސް އެމީހުންގެ ކިބައިން ސަލާމަތްވެ ގެއަށް ދިއުމަށް ކަމަށެވެ.
ޖިންސީ ގޯނާގެ ތުހުމަތު ކުރެވުނު ދެމީހުން ހައްޔަރުން ދޫކޮށްލީ ބަނގުރަލަށް ޓެސްޓު ކުރުމެއް ވެސް ނެތިއެވެ. ފުލުހުން ބުނީ އެމީހުން ތިބީ ބަނގުރާ ބޮއެގެން ކަމަށް ނުބެލެވޭ ކަމަށާއި ޓެސްޓު ނުކޮށް ދޫކޮށްލީވެސް އެހެންވެ ކަމަށެވެ.
ސޯޝަލް މީޑިޔާގައި މިމައްސަލައާ ގުޅިގެން ފެތުރިފައިވާ އަޑުތައް ގިނަވެފައިވާއިރު، ކެންޔާ އަންހެން މީހާއަށް ބިރު ދައްކައި ހަގީގަތް ފޮރުވާލަން ބަޔަކު މަސައްކަތް ކުރި ކަމަށް އަޑު ފެތުރިފައިވެއެވެ. އެދަނޑިވަޅުގައި އަންހެން މީހާ ވަނީ ދައުވާ ކުރަން ބޭނުން ނުވާ ކަމަށް ވެސް ހާމަކޮށްފައެވެ.
މީގެ އިތުރުން ވެސް ރާއްޖޭގެ އެކި ހިސާބުތަކުގައި އަންހެނުންނަށް ކުރާ އަނިޔާއާއި ޖިންސީ ގޯނާ އަދި ރޭޕްގެ މައްސަލަތައް އަންނަނީ އިންތިހާއަށް އިތުރުވަމުންނެވެ. އެގޮތުން 18 އަހަރު ނުފުރޭ ދެކުދިން ރޭޕްކޮށް ބަނޑުބޮނޑުވި މައްސަލައެއް ވެސް މިހަފްތާ ތެރޭ ވަނީ ފެންމަތިވެ ތަހުގީގު ކުރަން ފަށާފައެވެ.