ބ. އަތޮޅުގައި ހަދަމުންދިޔަ ބޮޑުފިނޮޅު ރިސޯޓުގައި ރޯކޮށް ގެއްލުންދީ، 12 ދިވެހި ރަހީނު ކުރި މައްސަލައަކީ ބޮޑު މައްސަލައެއް ކަމަށާއި އެއީ ކޮންމެފަދަ ހާލަތެއްގައި ކުރިޔަސް ކުށެއް ކަމަށް ޑިފެންސް މިނިސްޓަރ މާރިޔާ އަހުމަދު ދީދީ ދެއްކެވި ވާހަކަފުޅު އެކަމަނާ ދިފާއުކޮށްފިއެވެ.
ބުރާސްފަތި ދުވަހު ބޮޑުފިނޮޅުގައި 19 ބިދޭސީން ވެގެން 12 ދިވެހިން ހައްޔަރުކޮށް ރަހީނުކުރީ، 7 މަސް ދުވަހުގެ މުސާރަ ނުދިނުމުގެ ސަބަބުން މުސާރަ ހޯދުމަށެވެ. އެރަށުގެ ކޮންޓްރޯލް ބިދޭސީން ނެގިއިރު ފުލުހުން ރަހީނު ކުރި ދިވެހީން ސަލާމަތް ކުރުމަށް ދިއުމުން ގާ އުކައި ފުލުހުން ދަތުރުކުރި ލޯންޗަށަށް ގެއްލުންދީ ބައެއް ފުލުހުންނަށް ވެސް ވަނީ އަނިޔާވެފައެވެ.
ނަމަވެސް މާލެއިން ދަތުރުކުރި ފުލުހުންގެ ޓީމެއް ވަނީ އެރޭ ރަށަށް އަރައި ބިދޭސީންގެ ތެރެއިން ހަޅުތާލުގައި އިސްކޮށް އުޅުނު 19 މީހުން ހައްޔަރުކޮށް ރަހީނުކުރި މީހުން ސަލާމަތްކޮށްފައެވެ.
މިމައްސަލައާ ގުޅިގެން ހޫނު ބަހުސެއް އުފެދިފައިވާއިރު ޑިފެންސް މިނިސްޓަރު މާރިޔާ ވަނީ މުސާރަ ނުދިނުމަކީ ގޯހެއް ކަމަށް ދެކެވަޑައިގަންނަވާ ކަމަށާއި، ނަމަވެސް ކުށެއް ނެތް ބަޔަކު ރަހީނުކޮށް ތަނަށް ގެއްލުން ދިނުމަކީ "އޯކޭ" ކަމެއްގެ ގޮތުގައި ނުދެކޭ ކަމަށް ވިދާޅުވެފައެވެ.
މިނިސްޓަރ ގެ ވާހާކަފުޅަށް ރައްދު ދެމުން ގިނަ ބަޔަކު ވަނީ، 7 މަސް ދުވަސް ވަންދެން މުސާރަ ނުދީ މަސައްކަތް ކުރުވި ފަރާތްތައް ހޯދައި ފިޔަވަޅު އަޅަން ޖެހޭ ކަމަށް ބުނެފައެވެ. އަދި މިހާލަތަށް ކަންކަން ގޯސްވެގެން ދިޔައީ އޭގެ ސަބަބުން ކަމަށް ބުނެފައެވެ.
ނަމަވެސް މާރިޔާ ވަނީ މުސާރަ ނުދީ ހިފެހެއްޓުމަކީ، ކުށެއް ނެތް ބަޔަކު ރަހީނު ކޮށްގެން ބިރު ދައްކައި ތަންތަނަށާއި ފުލުހުންގެ ލޯންޗަށް ގެއްލުން ދީގެން ވާނެ ކަމެއް ނޫން ކަމަށް ބުނެ އެކަމަނާގެ ވާހަކަފުޅު ތަކުރާރުކޮށްފައެވެ. މާރިޔާ ވިދާޅުވީ ހިއުމަން ރައިޓސް ކޮމިޝަން ފަދަ މުއައްސަސާތައް ތިބީ މިފަދަ މައްސަލަތައް ބެލުމަށް ކަމަށާއި، އަނިޔާވެރިކަން އިސްކުރުމަކީ ބަލައިގަނެވޭނެ ކަމެއް ނޫން ކަމަށް ވިދާޅުވެފައެވެ.
ބޮޑުފިނޮޅުގައި ދިވެހިން ރަހީނުކުރި ބިދޭސީން ވަނީ ފުލުހުންގެ ޓީމަށް ހަމަލާ ދިނުމުގެ ކުރިން ތުޅާދޫން އެރަށަށް އަރަން މަސައްކަތް ކުރި ދިވެހިންގެ ދޯންޏަކަށް ވެސް ގާއުކައި ހަމަލާ ދީފައެވެ. ރަށް ކޮންޓްރޯލް ކުރެވުނީ ރަޔަޓް ގިޔަރުގައި މާލެއިން ދިޔަ ފުލުހުންގެ ޓީމެއް އެރުމުން ބިދޭސީން އަމާން ދިނުމުންނެވެ.
އޭރު ސިފައިންގެ ޓީމެއް ވެސް ވަނީ ފުލް ހަތިޔާރުގައި ރަށަށް އަރައި ކޮންޓްރޯލް ކުރުމަށް ތައްޔާރުވަމުންނެވެ.