އައިޖީއެމްއެޗް ހޮސްޕިޓަލުން ކޮވިޑް19 އަށް ޕޮޒިޓިވްވި މުވައްޒަފުންގެ އަދަދު ހަތަރަކަށް އަރައިފިއެވެ.
އައިޖީއެމްއެޗް އިން މިއަދު ނެރެފައިވާ ބަޔާނެއްގައި ބުނީ އެ ހޮސްޕިޓަލުގައި ފަރުވާ ދެމުން ދިޔަ ހާލުބޮޑު ދެ ބަލި މީހަކާއި އެ ހޮސްޕިޓަލުގެ ހަތަރު މުވައްޒަފު ކޮވިޑް19 އަށް ޕޮޒިޓިވްވެފައިވާ ކަމަށެވެ. އެގޮތުން އައިސީޔޫ އާއި އޮޕަރޭޝަން ތިއޭޓަރުގެ ޑޮކްޓަރުންނާއި ނަރުހުން އަދި ކޮންޓެކްޓް ޓްރޭސިން އިން ފާހަގަވި އެހެނިހެން މުވައްޒަފުން އެކަހެރިކޮށް ޓެސްޓު ކުރުމުގެ މަސައްކަތް ކުރިއަށްދާ ކަމަށެވެ.
އައިޖީއެމްއެޗް އިން ބުނީ ޓެސްޓު ކުރުމުގެ ބޮޑުބައެއް މިހާރު ނިމިފައިވާ ކަމަށެވެ. އަދި މިހާތަނަށް ޓެސްޓު ކުރެވުނު އެހެން މުވައްޒަފުންގެ ޓެސްޓު ވަނީ ނެގެޓިވްވެފައިވާ ކަމަށެވެ. އެ ބައްޔަށް ޕޮޒިޓިވްވި ޕޭޝަންޓުން މިހާރު ޑީއެޗް 11 އަށް ބަދަލުކުރެވިފައިވާ ކަމަށާއި އެ ފަރާތްތަކުގެ ހާލު ރަނގަޅު ކަމަށާއި އަދި ޕޮޒިޓިވްވި މުވައްޒަފުންގެ ހާލުވެސް ރަނގަޅު ކަމަށް އައިޖީއެމްއެޗްގެ ބަޔާނުގައި ބުނެފައިވެއެވެ.
އައިސީޔޫގައި މިވަގުތު ކޮވިޑް19 އަށް ޕޮޒިޓިވްވެފައިވާ ބަލި މީހެއް އަދި މުވައްޒަފެއް ނެތް ނަމަވެސް ރައްކާތެރިވުމުގެ ގޮތުން އިތުރަށް އަޅާ ފިޔަވަޅެއްގެ ގޮތުން މިވަގުތަށް އިތުރު ބަލި މީހުން އައިސީޔޫ އަށް ވެއްދުން މަޑުޖައްސާލައި، އައިސީޔޫ އިން ދޭންޖެހޭ ފަރުވާ ދެވޭނެ ގޮތް ހޮސްޕިޓަލުގެ އެހެން ތަނެއްގައި ހަމަޖެހިފައިވާ ކަމަށް އައިޖީއެޗްގެ ބަޔާނުގައިވެއެވެ.
ހޮސްޕިޓަލުގެ އެޑްމިޓް ކޮށްގެން ފަރުވާދޭ ބަލި މީހުން ކޮވިޑް19 އަށް ޓެސްޓު ކުރުމުގެ ނިޒާމް އިތުރަށް ހަރުދަނާކޮށް، ހުރިހާ ބަލި މީހުން ވެސް ކޮވިޑް19 އަށް ޓެސްޓު ކުރާ ގޮތަށް މިހާރު ހަމަޖެހިފައިވާ ކަމަށާއި ނަމަވެސް ބަލި މީހެއްގެ ފުރާނަ ސަލާމަތް ކުރަންޖެހޭ ފަދަ ނުވަތަ އެނޫންވެސް ބޮޑު އިމަޖެންސީ ހާލަތެއް މެދުވެރިވެއްޖެ ނަމަ ކޮވިޑް19 ގެ ނަތީޖާ ލިބެންދެން މަޑުނުކޮށް، ދޭންޖެހޭ ފަރުވާ ދޭނެ ކަމަށް އެ ހޮސްޕިޓަލުން ބުންޏެވެ.