ސިފައިންނާއި ފުލުހުންނަށް ހުޅުމާލޭގައި އިމާރާތް ކުރާ ފްލެޓްތަކުގެ މަސައްކަތް ކުރާ ތައިލެންޑުގެ އައިލެންޑް އެކްސްޕާޓް ކުންފުނީގެ ބިދޭސީ މުވައްޒަފުންނަށް މުސާރަ ނުދޭތީ ހިންގި ހަމަނުޖެހުމުގައި 22 ބިދޭސީއަކު ހައްޔަރުކޮށްފިއެވެ.
ފުލުހުން ބުނީ ހަމަނުޖެހުން ހިންގި މީހުންގެ ތެރެއިން 22 މީހަކު މިހާތަނަށް ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އިތުރު ތަފްސީލެއް ނުލިބެއެވެ.
މީގެކުރިން ފުލުހުން ބުނީ އައިލެންޑް އެކްސްޕާޓުގެ ބިދޭސީ މުވައްޒަފުންތަކެއް މުސާރަ ނުލިބޭތީ އެކަމާ ހިތްހަމަނުޖެހުން ފާޅުކުރުމަށް ހުޅުމާލޭގައި މުޒާހަރާއެއް ކުރަމުންދާ ކަމަށެވެ.
އެގޮތުން މި މުޒާހަރާގެ ތެރެއިން ހަމަނުޖެހުން ހިންގައި، ބައެއް ފުލުހުންނަށް އަނިޔާވެ ވެހިކަލަކަށް ގެއްލުން ވެފައިވާ ކަމަށްވެސް ފުލުހުން ބުނެއެވެ.
އެ ހަމަނުޖެހުން މިހާރު ކޮންޓްރޯލް ކޮށްފައިވާއިރު، މުޒާހަރާ ކުރަމުންދާ ބިދޭސީން މިވަގުތު ތިބީ އައިލެންޑް އެކްސްޕާޓުގެ ލޭބަރު ކުއާޓާގައި ކަމަށް ފުލުހުން ބުނެއެވެ.
މުސާރަ ނުދޭތީ އައިލެންޑް އެކްސްޕާޓުގެ މުވައްޒަފުން މުޒާހަރާ ކުރަމުންދާއިރު، މުސާރަ ނުލިބި ލަސްވެގެން ދާދިފަހުން ބ. އަތޮޅު ބޮޑުފިނޮޅުގައި ހަދަމުންދާ ރިސޯޓެއްގައި ބިދޭސީންތަކެއް ހަމަނުޖެހުންތަކެއް ހިންގައި، އެތަނުގައި ތިބި ދިވެހިންތަކެއް ވަނީ ރަހީނުކޮށްފައެވެ.
ރަހީނުކުރި އެ 11 ދިވެހިން ސަލާމަތްކޮށްފައިވަނީ ފުލުހުން އެ ރަށަށް ގޮސް ހިންގި ހާއްސަ އޮޕަރޭޝަނެއްގައެވެ. އެ ރަށުގައި ހަމަނުޖެހުން ހިންގި ބައެއް ބިދޭސީން މިހާރު ވަނީ ހައްޔަރުވެސްކޮށްފައެވެ.