ގުޅިފަޅު ހިއްކުމަށް ފަހު އެ ތަނުން މާލޭގެ ރައްޔިތުންނަށް 1،200 ބިން ނުވަތަ ގޯތި ދޫކުރަން ސަރުކާރުން ނިންމާފައިވާ ކަމަށް ޕްލޭނިން އެންޑް ހައުސިން މިނިސްޓަރު މުހައްމަދު އަސްލަމް ރައްޔިތުންގެ މަޖިލީހުގައި މިއަދު ވިދާޅުވެއްޖެއެވެ.
ރައްޔިތުން މަޖިލީހުގެ މިއަދުގެ ޖަލްސާގައި ވާހަކަދައްކަވަމުން އަސްލަމް ވިދާޅުވީ މާލޭގައި 5،000 އާއިލާއެއް ބޯހިޔާވަހިކަން ބޭނުންވެފައި އެބަތިބި ކަމަށެވެ. އެގޮތުން ގުޅީފަޅުން މިހާރު ހިއްކަމުން އަންނަ ބިމުގެ ސަރަހައްދުން 1،200 ބިން މާލޭ ރައްޔިތުންނަށް ދޫކޮށްލުމުން އެކަމަށް ހައްލެއް ލިބިގެން ދާނެ ކަމަށް އޭނާ ވިދާޅުވިއެވެ.
ހުޅުމާލެ ދެވަނަ ފިޔަވަހީގައި ރައީސް އަބްދުﷲ ޔާމީންގެ ސަރުކާރުން އަޅާފައިވާ ހިޔާ މަޝްރޫއުގެ ފްލެޓުތައް ލިބޭނެ ފަރާތްތައް އަންނަ މަހުގެ ތެރޭގައި އިއުލާން ކުރެވިގެން ދާނެ ކަމަށްވެސް އަސްލަމް ވިދާޅުވިއެވެ. ހައުސިންގެ ފްލެޓްތަކުގައި ދިރިއުޅެވޭނެ މީހުންގެ އަދަދު ނުވަތަ ވަކި ޓާގެޓެޑް ޕޮޕިއުލޭޝަނަކަށް ހާއްސަކޮށްފައި ނުވާތީ ފްލެޓްތަކުގައި ދިރިއުޅެން ޖެހޭ މީހުންނަށްވުރެ ގިނަ މީޙުން އެއްތަނެއްގައި ދިރިއުޅެމުންދާ ކަމަށެވެ.
"ހިޔާ މަޝްރޫއުގެ ތެރޭގައި ވަންނަނީ ވަކި ޓާގެޓް ޕޮޕިއުލޭޝަން އަށް ނުވާތީ އެއަށް އެހެން މީހުން ވެއްދުމަށް ޕްލޭން ކުރެވިފައިވޭ. މާލޭގައި ދިރިއުޅޭ ރައްޔިތުން ނޫން އެހެން ރައްޔިތުން،" އަސްލަމް ވިދާޅުވިއެވެ.
ގުޅީފަޅު ޕްރޮޖެކްޓަކީ ތިލަފުށި މާލޭ ގުޅިފަޅު އަދި ހުޅުމާލޭ ގުޅާލާ ބްރިޖާއެކު ހިންގާ ޕްރޮޖެކްޓެކެވެ