އައްޑޫ އާއި ހދ. ކުޅުދުފުއްށީގެ ބަނދަރަށް ގެންނަ ބައެއް މުދަލުން ނަގާ ޑިއުޓީ ކުޑަ ކުރުމަށް އިމްޕޯޓު އެކްސްޕޯޓުގެ ގާނޫނަށް ހުށަހަޅާފައިވާ އިސްލާހު ރައްޔިތުން މަޖިލީހުން ފާސްކޮށްފިއެވެ.
ގަމު ދާއިރާގެ މެންބަރު މުހައްމަދު ވިސާމް މަޖިލީހަށް ހުށަހެޅި އެ އިސްލާހު ފާސްކުރީ 58 މެންބަރުންގެ ވޯޓުންނެވެ.
މި ބިލު އެންމެ ފުރަތަމަ ދިރާސާ ކޮށްފައި ވަނީ މުޅި މަޖިލީހުގެ ކޮމެޓީންނެވެ. އަދި އެއަށްފަހު މެންބަރުންނަށް އިސްލާހުތައް ހުށަހެޅުމަށް ފުރުސަތު ދިނުމަށް ފަހު ބިލު ފާސްކުރީ މެންބަރުން ހުށަހަޅާފައިވާ އިސްލާހުތަކާއި އެކުގައެވެ.
މުޅި މަޖިލީހުގެ ކޮމެޓީން ބިލު ފާސްކުރިއިރު ސަރަހައްދީ ބަނދަރުތަކަށް ގެންނަ ސިނގިރޭޓުން 50 ޕަސެންޓު ޑިއުޓީ ކަނޑާލުމަށް ފާސްކުރިއެވެ. ނަމަވެސް ފަހުން އާއްމުންގެ ކަންބޮޑުވުންތަކާއި ގުޅިގެން އެ އިސްލާހަކަށް ވޯޓަކަށް ނާހައެވެ. ނަމަވެސް ހިތަދޫ މެދު ދާއިރާގެ މެންބަރު އަހުމަދު ރަޝީދު ވަނީ ސިނގިރޭޓު ނުވަތަ ދުންފަތުގެ ބާވަތްތަކުން ނަގާ ޑިއުޓީގެ ތިން ޕަސެންޓުން އާއްމު ސިއްހަތު ރައްކާތެރި ކުރުމުގެ ގާނޫނުގެ ދަށުން ގާއިމް ކޮށްފައިވާ ފަންޑަށް ޖަމާ ކުރުމަށް ހުށަހަޅާފައެވެ. އެ އިސްލާހު ވެސް ވަނީ ފާސްކޮށްފައެވެ.
ފަންސާސް ޕަސެންޓު ޑިއުޓީ ކަނޑާލާއިރު އެ ސަރަހައްދެއްގެ ސަރަހައްދީ ބަނދަރު ނިސްބަތްވާ ރަށުގައި ގުދަންކުރެވޭ ނުވަތަ އެ ސަރަހެއްދެ ސަރަހައްދީ ބަނދަރު ނިސްބަތްވާ ރަށުގެ ލޯކަލް ބަނދަރުން ބޭރުކުރެވޭ މުދަލަށް ވާން ޖެހެއެވެ.