ކުރީގެ ރައީސް އަބްދުﷲ ޔާމީންގެ ސަރުކާރުން އެއްވެ އުޅުމުގެ ގާނޫނަށް ގެނެސްފައިވާ އިސްލާހު ބާތިލް ކުރުމަށް ބާ ކައުންސިލުން ސަރުކާރަށް ގޮވާލައިފިއެވެ.
ބާ ކައުންސިލުން ރޭ ނެރުނު ބަޔާނެއްގައި ބުނެފައި ވަނީ ހޯމް މިނިސްޓްރީން އޯގަސްޓް، 31، 2016 ގައި ކޮށްފައިިވާ އިއުލާން ތަކުރާރުކޮށް، ޖުލައި، 14، 2020 ގައި އާންމުކޮށްފައިވާ އިއުލާން ބާތިލުކުރުމަށް ދިވެހި ސަރުކާރަށް ގޮވާލާ ކަމަށެވެ.
ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނުގެ 24 ވަނަ މާއްދާގެ (ޅ) އިސްލާހުކުރުމަަށް ރައްޔިތުންގެ މަޖިލީހުގެ މެމްބަރުންނަށް ބާ ކައުންސިލުން ގޮވާލާފައިވާއިރު އެ ކައުންސިލުން ނެރެފައިވާ ބަޔާނުގައި ބުނީ އެ ކައުންސިލުން ގަބޫލުކުރާ ގޮތުގައި ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނުގެ 24ވަނަ މާއްދާގެ (ޅ) ގެ ދަށުން ނެރެފައިިވާ އިއުލާނަކީ ގާނޫނުއަސާސީގެ 32 ވަނަ މާއްދާއާއި ހިލާފު އެކަށައެޅުންތަކެއް ކަމަށެވެ.
އެއްވެއުޅުމުގެ މިނިވަންކަން ރައްކާތެރިކޮށް ކުރިއެރުވުމަކީ ގާނޫނުއަސާސީގެ ދަށުން ދިވެހި ދައުލަތުގެ މައްޗަށް މަތިކޮށްފައިިވާ ދުސްތޫރީ ވާޖިބެއް ކަމަށްވެސް ބާ ކައުންސިލްގެ ބަޔާނުގައިވެއެވެ. އަދި އެކަން ހަނިކުރާނަމަ ސަރުކާރަށް އެކަން ކުރެވޭނީ ކުރިއަރާފައިިވާ ދިމިގްރާތީ މުޖުތަމައުތައް ބަލައިގެންފައިވާ މަައިގަނޑު އުސޫލުތަކާ އެއްގޮތަށް ކަމަށްވެސް ބާ ކައުންސިލްގެ ބަޔާނުގައިވެއެވެ.
ހޯމް މިނިސްޓްރީން ކުރި އިއުލާނެއްގައި ބުނީ، ފުލުހުންގެ ހުއްދަ ލިބިގެން ނޫނީ މާލޭގައި ކުރާ އެއްވެސް މުޒާހަރާއެއް، ނުވަތަ އެއްވުމެއް ވެސް ބޭއްވޭނީ ހަމައެކަނި ކާނިވާ ސަރަހައްދުގައި ކަމަށް އޮކްޓޫބަރު، 2016 ގައި އިއުލާނަކުން ކަނޑައަޅާފައިވާނެ ކަމަށެވެ.
ކާނިވާ ސަރަހައްދުގައި އެއްވެ އުޅެވޭނެ ގޮތަށް ގާނޫނަށް އިސްލާހު ގެނައީ ކުރީގެ ރައީސް އަބްދުﷲ ޔާމީންގެ ސަރުކާރުންނެވެ. މީގެކުރިން ގާނޫނުގައި އޮންނަނީ ގްރީން ޒޯންގެ ގޮތުގައި ކަނޑައަޅާފައިވާ ތަންތަން ފިޔަވާ އެހެން ކޮންމެ ތަނެއްގައިވެސް އެއްވެ އުޅެވޭނެ ކަމަށެވެ.