ބ. އަތޮޅުގައި ރިސޯޓެއްގެ ގޮތުގައި ތަރައްގީ ކުރަމުން އަންނަ ބޮޑުފިނޮޅުގައި މަސައްކަތް ކުރަމުން ދިޔަ ބިދޭސީންނަށް ބޮޑުފިނޮޅުގައި އިހުތިޖާޖު ކުރަން ހިތްވަރު ލިބިގެން ދިޔައީ އެމުވައްޒަފުންނަށް ބިރު ދެއްކުމުން ކަމަށާއި އެހެންކަމުން އެ މައްސަލަ ބަލައި ދިނުމަށް ބިދޭސީންގެ ވަކީލުންގެ ޓީމުން ޕްރޮސިކިއުޓަރު ޖެނެރަލް (ޕީޖީ)ގައި އެދިއްޖެއެވެ.
ވަކީލުން ވަނީ ބިދޭސިންނަށް ބިރު ދައްކާ ހައްޔަރު ކުރި މައްސަލައާއި ގުޅޭގޮތުން ނޫސްބަޔާނެއް ނެރެފައެވެ. އެ ނޫސްބަޔާނުގައި ބުނެފައިވަނީ އެ މައްސަލައިގެ ހަގީގަތް ހޯދުމުގެ މަސައްކަތް ކުރިއަށް ދަނިކޮށް އެ މައްސަލަ ތަހުގީގުކުރާ ފުލުހުންގެ ތެރެއިން އިންވެސްޓިގޭޓަރަކު ކަމަށް ބުނެ މީހަކު ގުޅާއި، ވަކީލުން ދެއްކީ ހުސް ދޮގު ކަމަށާއި ޖޭއެސްސީއަށް މައްސަލަ ހުށަހަޅަން ޖެހެނީ ކީއްވެގެންތޯ ސުވާލުކޮށް، ވަކީލުން ނެރުނު ބަޔާނުގެ ސަބަބުން ކޯޓުގެ ނަމާއި ފުލުހުންގެ ނަމަށް ހުތުވާ ކަމަށް ބުނެފައިވާ ކަމަށެވެ. އަދި އެ މައްސަލައަށް ނުފޫޒުފޯރުވަން މަސައްކަތް ކުރާ ކަމަށާއި ބ. އަތޮޅު ފުލުހުންގެ ފަރާތުން އެ މައްސަލައިގެ މުހިންމު ހަގީގަތްތަކެއް ފޮރުވުމަށް މަސައްކަތްކުރާކަމަށް ޝައްކު ކުރެވޭ ކަމަށް ވެސް ބުނެއެވެ.
ބަޔާނުގައި ބުނެފައިވަނީ ބިދޭސީންނަށް އަނިޔާވެރިވުމުގެ ގޮތުން ބިރު ކުރިމަތިކުރުވުމާއި ގޭންގް ހަދާއި ޓެރަރިޒަމްގެ ކުށް ކުރަން އުޅުމާއި ބިދޭސީންނަށް މުސާރަ ނުދީ ޑީޕޯޓްކޮށްލާނެ ކަމުގެ އިތުރުން ބިދޭސީންނަށް ހަމަލާދޭނެ ކަމަށް ބުނެ އިންޒާރު ދީފައިވާ ކަމަށެވެ.
ބޮޑުފިނޮޅު ހަނގުރާމައިގެ މައިދަނަކަށް ބަދަލުކޮށް އަމިއްލަ ނަފްސުގެ ދިފާއުގައި ނިކުންނަން ޖެހުނީ މަޖުބޫރުވެގެން ކަމަށާއި އެއީ އެމީހުންނަށް ބިރުދެއްކުމުން ކަމަށް ބަޔާނުގައި ބުނެފައިވެއެވެ.
އެ ބަޔާނުގައި ބަންދުކުރެވިފައި ތިބި 19 ބިދޭސީންގެ ބަންދު ރިވިއު ކޮށްދިނުމަށް ޕީޖީގެ އަމިއްލަ އިސްނެގުމުގެ މަތިން ކޯޓަށް ހުށަހަޅާ ދިނުމަށާއި ބަންދުގެ މުއްދަތު އިތުރުކޮށްދިނުމަށް އެދި ބ. އޭދަފުށީ ފުލުހުންގެ ފަރާތުން ކޯޓަށް ހުށަހެޅި ފޯމުގައި ސައްހަ ނޫން މައުލޫމާތު ހިމަނާފައިވާތީ އެކަންވެސް ވަކިން ތަހްގީގު ކޮށްދިނުމަށް އެދިފައިވެއެވެ.