ޕާމް ބީޗް ރިސޯޓު ނީލަމުގައި ވިއްކައިލަން ސްޓޭޓް އޮފް ބޭންކް އޮފް އިންޑިއާ (އެސްބީއައި) އިން އަނެއްކާވެސް އިއުލާންކޮށްފިއެވެ.
އެ ރިސޯޓު ވިއްކާލަން އިއުލާން ކޮށްފައި ވަނީ އެސްބީއައި އިން ނަގާފައިވާ ލޯނެއް ނުދައްކާ އޮތުމުންނެވެ. އެސްބީއައި އިން ކޮށްފައިވާ އިއުލާނެއްގައި ބުނީ މޮނާޒާ ކޮންސްޓްރަކްޝަން އާއި ގާޑިއަން އޭޖެންސީ ޕްރައިވެޓް ލިމިޓެޑް ކިޔާ ކުންފުންޏަކުން އެ ރިސޯޓް ރަހުނު ކޮށްގެން ނެގި ލޯނަކަށް ފައިިސާ ނުދެއްކުމުން، ވިއްކައިލުމުގެ ހުއްދަ ސިވިލް ކޯޓުން ބޭންކަށް ދިނުމުން ކަމަށެވެ.
އަންނަ މަހުގެ ހަތަރު ވަނަ ދުވަހާ ހަމައަށް އެންމެ މަތީ އަގެއް ހުށަހަޅާ ފަރާތަކަށް އެތަން ވިއްކައިލެވޭނެ ކަމަށް އިއުލާނުގައިވެއެވެ. ޕާމް ބީޗު ވިއްކައިލުމުގެ ނީލަން ކުރިއަށްގެންދާނީ ފަސް އޮފިސަރުންގެ ޓީމަކުން ކަމަށް އެސްބީއައި އިން ބުންޏެވެ.
ނީލަން ކާމިޔާބު ކުރާތާ 15 ދުވަސް ތެރޭގައި އެއް މިލިއަން ޑޮލަރު ދެއްކުމަށް ފަހު ބާކީ ފައިސާ 60 ދުވަސް ތެރޭގައި ދައްކަން ޖެހޭނެ ކަމަށް އެސްބީއައިން ބުނެއެވެ.