އިސްރާއީލުން ފަލަސްތީނުގެ ބިންތަކަށް ވެރިވުމަށް ކުރާ މަސައްކަތާ ދެކޮޅަށް ރައްޔިތުންގެ މަޖިލީހަށް ހުށަހެޅި ގަރާރު ރައްޔިތުންގެ މަޖިލީހުން ބަލައިގެންފިއެވެ.
މި ގަރާރު މަޖިލީހަށް ހުށަހަޅުއްވައިދެއްވީ ވިލިނގިލީ ދާއިރާގެ މެމްބަރު ސައުދު ހުސެއިންއެވެ. މިއަދުގެ ޖަލްސާގައި ސައުދު ހުށަހެޅުއްވި ގަރާރު ބަލައިގަތީ 64 މެންބަރުންގެ ވޯޓުންނެވެ. ގަރާރު އިތުރަށް ދިރާސާ ކުރުމަށް ގައުމީ ސަލާމަތާ ހާރިޖީ ގުޅުންތަކުގެ ކޮމެޓީއަށް ވަނީ ފޮނުވާފައެވެ.
މި ގަރާރު ހުށަހަޅުއްވަމުން ސައުދު ވިދާޅުވީ އިސްރާއީލުން ފަލަސްތީނުގެ ބިންތައް ފޭރިގަނެ، އެ ބިންތަކަށް ވެރިވެގަތުމަކީ އިސްރާއީލާއި ފަލަސްތީނު ސުލްހަވެ، ވަކި ދެ ދައުލަތެއް ގާއިމުކުރުމަށް ކުރަމުންދާ މަސައްކަތައް އެޅޭނެ އިތުރު ހުރަހެއް ކަމަށެވެ.
އިސްރާއީލުން ފަލަސްތީނުގެ ބިންތަކަށް ވެރިވެގަތުމަށް ކުރާ މަސައްކަތާއި، ފަލަސްތީނުގެ ރައްޔިތުންނަށް ދެމުންދާ އަނިޔާތައް ހުއްޓުމެއް ނެތި ކުރިއަށް ދިޔުމަކީ އިންސާނީ ކަރާމާތާއި ޝަރަފް ނަގާލުން ކަމަށާއި މިފަދަ އަމަލުތަކަކީ ބައިނަލްއަގުވާމީ މުޖުތަމައުގެ ގާނޫނުތަކާއި ހިލާފު ކަމަކަށްވާތީ އެކަންކަން ހުއްޓުވުމަށް ގޮވާލުމަކީ އިސްރާއީލުގެ އަނިޔާވެރި އަމަލުތައް ހުއްޓުވުމުގެ ތެރެއިން ކުރެވޭ މަސައްކަތެއް ކަމަށްވެސް ސައުދު ވިދާޅުވިއެވެ.
ދިވެހި ރައްޔިތުންނަކީ އަބަދުވެސް ފަލަސްތީނުގެ ރައްޔިތުންނާއި އަހުވަންތަކަން ދެމެހެއްޓުމަށް މަސައްކަތްކުރާ ބައެއް ކަމަށާއި މިފަދަ ހިތްދަތި ވަގުތެއްގައި ރާއްޖެ އޮތީ ފަލަސްތީނާއި އެކުގައިކަން މަޖިލީހުން ހާމަކުރުމަކީ މިކަމާ ދެކޮޅަށް ކުރާ މަސައްކަތްތަކަށް ލިބޭނެ ކުރިއެރުމެއް ކަމަށްވެސް ސައުދު ވިދާޅުވިއެވެ.
މިފަދަ ގަރާރެއް މަޖިލީހަށް ހުށަހަޅާފައިވާއިރު ފަލަސްތީނުގެ ބިންތަކުގެ ބޮޑު ބައެއް އިސްރާއީލުން އަނެއްކާވެސް ހިފުމަށް ކުރަމުންދާ މަސައްކަތް ދިވެހި ސަރުކާރުން ވެސް ވަނީ ކުށްވެރިކޮށްފައެވެ.