އާއްމުންގެ ތެރެއިން ޖުޑީޝަލް ސާވިސް ކޮމިޝަން (ޖޭއެސްސީ) އަށް މޫންލައިޓު ހައުސް، ސ. މަރަދޫ، އާމިނަތު އުއްމު ކުލްސޫމް އައްޔަން ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
މަޖިލީހުން އުއްމު ކުލްސޫމް ޖޭއެސްސީ އަށް އާއްމުންގެ ތެރެއިން އައްޔަން ކުރައްވާ ބޭފުޅެއްގެ ގޮތުގައި ހަމަޖެއްސެވީ މިއަދު މަޖިލިސް ޖަލްސާގައި ނެގި ވޯޓުގައި 69 މެންބަރުންގެ ވޯޓުންނެވެ.
ޖޭއެސްސީ އަށް އާއްމުންގެ ތެރެއިން ބޭފުޅަކު އައްޔަން ކުރެއްވުމަށް ފާސްކޮށްފައި މިވަނީ މީގެކުރިން ދެ ފަހަރެއްގެ މަތިންވެސް އެ މަގާމަށް ކުރިމަތިލުމަށް ހުޅުވާލި ފުރުސަތުގައި އެކަށީގެންވާ ތަރުހީބެއް ލިބިފައި ނުވުމުން ތިންވަނަ ފަހަރަށް އިއުލާން ކޮށްގެންނެވެ. ތިންވަނަ ފަހަރަށް އިއުލާން ކޮށްގެން ކުރިމަތިލީ ފަސް ފަރާތެކެވެ.
ޖޭއެސްސީ އެކުލެވިގެންވަނީ، އާންމުންގެ ތެރެއިން ކަނޑައަޅާ މެމްބަރެއްގެ އިތުރުން ރައްޔިތުންގެ މަޖިލީހުން ކަނޑައަޅާ މެމްބަރަކާއި ސިވިލް ސާވިސް ކޮމިޝަންގެ ރައީސް އާއި ބަންޑާރަ ނާއިބާއި ރައީސުލްޖުމްހޫރިއްޔާ ކަނޑައަޅާ މެމްބަރަކާއި ގާނޫނީ ވަކީލުންގެ ތެރެއިން ކަނޑައަޅާ ވަކީލަކާއި ދަށު ކޯޓުތަކުން ކަނޑައަޅާ ފަނޑިޔާރެއްގެ އިތުރުން ހައިކޯޓުން ކަނޑައަޅާ ފަނޑިޔާރަކާއި ސުޕްރީމް ކޯޓުން ކަނޑައަޅާ އެ ކޯޓުގެ ފަނޑިޔާރެއްގެ މައްޗަށެވެ.