ރައީސް އިބްރާހީމް މުހައްމަދު ސޯލިހު ފަސް ގައުމަކަށް ރާއްޖެއިން ކަނޑައަޅާފައިވާ ސަފީރުންނަށް ރުހުން ހޯދުމަށް މަޖިލީހަށް ފޮނުއްވި މައްސަލާގައި ހުރިހާ ސަފީރުންނަށް ރުހުން ދިނުމަށް މަޖިލީހުން ފާސްކޮށްފިއެވެ.
ރުހުން ދެއްވި ބޭފުޅުންގެ ތެރޭގައި ޔުނައިޓެޑް އަރަބް އެމިރޭޓްސްއަށް ކަނޑައަޅުއްވާ ދިވެހިރާއްޖޭގެ ސަފީރުކަމަށް އައިމިނަތު ޝަބީނާ އާއި ބަންގްލަދޭޝްއަށް ކަނޑައަޅުއްވާ ދިވެހިރާއްޖޭގެ ސަފީރުގެ މަގާމަށް ކަނޑައަޅުއްވާފައިވާ ޝިރުޒިމަތު ސަމީރު ހިމެނިވަޑައިގަންނަވައެވެ.
ޕާކިސްތާނަށް ކަނޑައަޅުއްވާ ދިވެހިރާއްޖޭގެ ސަފީރުކަމަށް ފަރްޒާނާ ޒާހިރާއި އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑރ. ހުސައިން ނިޔާޒުގެ އިތުރުން ސްވިޓްޒަލެންޑްގެ ޖެނީވާގައި ހުންނަ އދގެ އޮފީސްތަކަށް ކަނޑައަޅާފައި ހުންނަ ދިވެހިރާއްޖޭގެ ދާއިމީ މިޝަންގެ ދާއިމީ މަންދޫބު ކަމަށް ކަނޑައަޅާފައިވާ ޑރ. އާސިމް އަހްމަދު ވެސް ހިމެނިވަޑައިގަންނަވައެވެ.
މި ހުރިހާ ބޭފުޅުންނަށް ވޯޓު ދެއްވީ ވަކި ވަކިންނެވެ. ކޮންމެ ބޭފުޅަކު ވެސް ވަނީ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްވެފައެވެ.
ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު މިއަދު ވަނީ އެ ހުރިހާ ބޭފުޅުންނާއި އަދި ރައީސް ސޯލިހާއި ފޮރިން މިނިސްޓަރު އަބްދުﷲ ޝާހިދަށް މަރުހަބާ ދަންނަވާފައެވެ. ވިދާޅުވީ މިއަދު ރުހުން ދެއްވި ފަސް ސަފީރުންނާއި އެކުގައި ރާއްޖެއިން ބޭރުގައި ތިއްބަވާ ދިވެހި ސަފީރުންގެ ތެރޭގައި މިންތީގެ ހަމަހަމަކަން އުފެދިގެންދާނެ ކަމަށެވެ.