ލޯކަލް ގަވަމެންޓް އޮތޯރިޓީ (އެލްޖީއޭ) ގެ ބޯޑުގެ ބައްދަލުވުންތަކާއި ގުޅޭ ގޮތުން ރައްޔިތުން މަޖިލީހަށް މަޑަވެލި ދާއިރާގެ މެންބަރު ހުސައިން ފިރުޝާން ހުށަހަޅުއްވާފައިވާ އިސްލާހު ރައްޔިތުންގެ މަޖިލީހަށް ބަލައިގެންފިއެވެ.
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ހާއްސަ ގާނޫނަށް ހުށަހެޅި އިސްލާހު ބަލައިގަތީ 67 މެންބަރުންގެ އިއްތިފާގުންނެވެ. މި ގާނޫނަކީ ކޮވިޑް19 ގެ ސަބަބުން މިއަހަރު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބު ފަސް ކުރުމަށްޓަކައި މަޖިލީހަށް ހުށަހަޅާ ފާސްކޮށްފައިވާ ގާނޫނެކެވެ.
އެ ގާނޫނުގައި އެލްޖީއޭގެ ބޯޑު އެކުލަވާލަން ޖެހެނީ ރައީސުލްޖުމްހޫރިއްޔާ ކަމަށް ކަނޑައަޅާފައިވީ ނަމަވެސް ބޯޑު ބައްދަލުވުންތަކުގތެ ރިޔާސަތު ބަލަހައްޓާނެ ބޭފުޅެއް ހާމަކޮށްފައެއް ނުވެއެވެ. އެހެންކަމުން އެ ގާނޫނަށް ފިރުޝާން ހުށަހެޅުއްވި އިސްލާހުގައި ވަނީ އެލްޖީއޭގެ ރައީސާއި ނާއިބު ރައީސަކީ ކޮބައިކަން ކަނޑައަޅާފައެވެ. އެ ބޯޑުގެ ރައީސަކީ ރައީސުލްޖުމްހޫރިއްޔާ ކަނޑައަޅާ މިނިސްޓަރެވެ. ނާއިބު ރައީސަކީ ބޯޑުގެ މެމްބަރުންގެ ތެރެއިން އިންތިހާބު ކުރާ ބޯޑުގެ މެމްބަރެކެވެ.
ބޯޑުގެ ބައްދަލުވުންތަކުގެ ރިޔާސަތު ބަލަހައްޓަވާނީ އެލްޖީއޭގެ ރައީސެވެ. ރައީސް ނެތް ހާލަތެއްގައި ރިޔާސަތު ބަލަހައްޓަވާނީ ނާއިބު ރައީސް ކަމަށް އިސްލާހުގައިވެއެވެ. އަދި އެ ދެ ބޭފުޅުންނަށް ހާޒިރުނުވެވޭނެ ނަމަ މެންބަރުން ކަނޑައަޅާ ބޭފުޅަކު ރިޔާސަތު ބަލަހައްޓާ ގޮތަށް ވެސް ބޯޑުގެ ބައްދަލުވުމެއް ބޭއްވޭނެ ކަމަށް އިސްލާހުގައިވެއެވެ.