މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޑެޕިއުޓީ ގަވަރުނަރުގެ މަގާމުގައި ހުންނެވި، އައިޝަތު ޒާހިރާ މަގާމުން ރިޓަޔާ ކުރައްވައިފިއެވެ.
ޒާހިރާ އަކީ އެމްއެމްއޭ އުފެދުނީއްސުރެ އެ އިދާރާގައި ހިދުމަތް ކުރައްވަމުން ގެންދެވި ބޭކަނބަލެކެވެ. ޒާހިރާ މަގާމުން ރިޓަޔާ ކުރެއްވީ ޑެޕިއުޓީ ގަވަރުނަރުގެ ދެ ޓާމު ނުވަތަ ދެ ދައުރު ފުރިހަމަ ކުރެއްވުމަށްފަހުއެވެ.
ޒާހިރާ ވަނީ އެމްއެމްއޭގައި 31 އަހަރު ހިދުމަތް ކުރައްވާފައެވެ. އެމްއެމްއޭގެ ގާނޫނުގައި ބުނެފައިވާ ގޮތުގައި ޑެޕިއުޓީ ގަވަރުނަރުގެ މަގާމުގައި ހުންނެވޭނީ ދެ ދައުރުއެވެ.
ޑެޕިއުޓީ ގަވަރުނަރުގެ މަގާމަކީ ރައީސުލްޖުމްހޫރިއްޔާ ނަން ހުށަހެޅުއްވުމުން ރައްޔިތުންގެ މަޖިލީހުގެ ރުހުން ލިބުމުން އައްޔަން ކުރައްވާ މަގާމެކެވެ. އެމްއެމްއޭ އިން ބުނީ ޒާހިރާ އެމްއެމްއޭ އަށް ކުރެއްވި ހިދުމަތަށް ޝުކުރު އަދާ ކުރައްވާ ކަމަށެވެ.