މާލެ ސިޓީ ކައުންސިލުން މާލޭގެ ލޮނުޒިޔާރަތް ކޮޅުގައި ތަރައްގީ ކޮށްފައިވާ ޕާކު އަންނަ ހަފްތާގައި ހުޅުވުމަށް ނިންމައިފިއެވެ.
އެތަނުގައި ކުރަންޖެހޭ ހުރިހާ މަސައްކަތެއް މިހާރު ކޮށް ނިންމާފައިވާއިރު މިހާރު ކުރިޔަށް ދަނީ އެތަން ހުޅުވުމުގެ ކުރިން ކުރަންޖެހޭ މަސައްކަތްތަކެވެ. އެތަނުގައި މައިގަނޑު ގޮތެއްގައި ހުރީ ގަސް އިންދާފައެވެ. އެހެންކަމުން އެތަނުގެ މެއިންޓެނަންސްގެ މަސައްކަތް ކުޑަވާނެ ކަމަށް ސިޓީ ކައުންސިލުން ބުނެއެވެ.
މާލެ ސިޓީ ކައުންސިލުން ބުނީ އެތަނުގެ ސެކިއުރިޓީ ވެސް ބަލަހައްޓާނީ ދިވެހިން ކަމަށެވެ. އަދި އެތަނުގެ ސެކިއުރިޓީ ވަރަށް ފުރިހަމަ އަށް ބަލަހައްޓާނެ ކަމަށް ސިޓީ ކައުންސިލުން ބުނެއެވެ. އެތަނުގެ މުވައްޒަފުންނަށް ދިވެހިން ނަގާފައިވާ ކަމަށްވެސް ސިޓީ ކައުންސިލުން ބުނެއެވެ.
މިދުވަސްވަރަކީ ކޮވިޑް19 ފެތުރޭ ދުވަސްވަރަކަށް ވާތީ އެތަން ހުޅުވި ނަމަވެސް އެތަނުގައި އަމަލުކުރާނީ އެޗްޕީއޭ އިން އަންގާފައިވާ އުސޫލުތަކާ އެއްގޮތަށް ކަމަށް މާލެ ސިޓީ ކައުންސިލުން ބުނެއެވެ.
ސިޓީ ކައުންސިލުން ބުނީ އިތުރު ޕާކެއް ހުޅުވުމުން އެއްތަނަކަށް ދާ މީހުން މަދުވާނެ ކަމަށެވެ. މިތަން ޕާކެއްގެ ގޮތުގައި ތަރައްގީ ކުރަން ފަށާފައި ވަނީ މިދިޔަ އަހަރުގެ ތެރޭގައެވެ.