ބަންދު ތެރޭގައި ހުށަހަޅާ އެޕްލިކޭޝަންތަކަށް ޕާސްޕޯޓު ދޫކުރެވޭނީ ސަރުކާރު ހުޅުވުމުން ކަމަށް މޯލްޑިވްސް އިމިގްރޭޝަނުން ބުނެފިއެވެ.
އިމިގްރޭޝަނުން ބުނީ މިނިވަން ދުވަހާއި އަދި ހައްޖު ދުވަހުގެ އިތުރުން މިއަހަރުގެ އަޟްހާ އީދު ދުވަހާއި ގުޅިގެން ސަރުކާރު ބަންދުކޮށްފައިވާ މުއްދަތުގައި އޮންލައިންކޮށް ހުށައަޅާ ޕާސްޕޯޓުތައް ލިބޭނީ އަންނަ މަހުގެ ހަތަރު ވަނަ ދުވަހު ސަރުކާރު އޮފީސްތައް ހުޅުވުމުން ކަމަށެވެ. އެހެންނަމަވެސް އިމަޖެންސީ ހާލަތެއް މެދުވެރިވެގެން ޕާސްޕޯޓް ހެއްދުމަށް އިމިގްރޭޝަންގެ ޕާސްޕޯޓް ހޮޓްލައިން ނަންބަރު 9555333 އަށް ގުޅައިގެން ކުރިއަށްގެންދިއުމަށް އެ އިދާރާއިން ވަނީ އެދިފައެވެ.
އީމެއިލް މެދުވެރިކޮށް ޕާސްޕޯޓަށް އެދުމުގެ ފުރުސަތު އިމިގްރޭޝަނުން ވަނީ މިހާރު ހުއްޓާލާފައެވެ. މިހާރު ޕާސްޕޯޓަށް އެދި ހުށަހަޅަން ޖެހޭނީ އިމިގްރޭޝަންގެ އޮންލައިން ޕޯޓަލް "އިމުގާ" މެދުވެރިކޮށެވެ.
އިމިގްރޭޝަނުން މީގެކުރިން ބުނީ imuga.immigration.gov.mv ގައި ރަޖިސްޓްރީ ކުރުމުން މި ޕޯޓަލް މެދުވެރިކޮށް ޕާސްޕޯޓަށް އެދި ހުށަހެޅޭނެ ކަމަށެވެ. އިމިގްރޭޝަންގެ މަޤްސަދަކީ ޒަމާނީ ވަސީލަތްތަކާއެކު ރައްޔިތުންނަށް ލުއިފަސޭހަ ޚިދުމަތްތަކެއް ފޯރުކޮށްދިނުން ކަމަށް ބުނެއެވެ.