އެންމެ ގްރާމެއް ވެސް ހަމަނުވާ ވަރަށް ބޭހުގެ ގޮތުގައި ބޭނުންކުރެވޭ މަސްތުވާއެއްޗެއް ގެންގުޅުނު ސ. ހުޅުދޫ މީހަކު 10 އަހަރަށް ޖަލަށް ލާން ކްރިމިނަލް ކޯޓުން ހުކުމްކޮށްފި އެވެ.
ހުޅުދޫ މަހްމާގޭ އަހުމަދު ޝިބާޒްގެ މައްޗަށް އެ ހުކުމް އިއްޔެ ކުރީ 2011 ވަނަ އަހަރުގެ ތެރޭގައި އޭނާ މަސްތުވާތަކެތި ގެންގުޅޭ ކަމަށް ތުހުމަތު ކުރެވުމުން އޭނާ ހައްޔަރުކުރަން އުޅުމުން އޭނާ އެއްލާލި ޗުވިންގަމް ކަރުދާސްކޮޅަކުން މަސްތުވާތަކެތި ފެނުނު މައްސަލައިގަ އެވެ. އޭނާގެ
ޝަރީއަތުގައި ޝިބާޒް ވަނީ އެ މަސްތުވާތަކެއްޗަކީ އޭނާގެ އެއްޗެއް ކަމަށާއި ނަމަވެސް އެއީ އޭނާ ބޭނުން ކުރުމަށްޓަކައި ގެންގުޅުނު އެއްޗެއް ކަމަށް ބުނެ ކުށަށް އިއުތިރާފްވެފަ އެވެ.
ނަމަވެސް ގާޒީ އަހުމަދު ސަމީރު އަބްދުލްއަޒީޒް އިއްވެވި ހުކުމުގައިވާ ގޮތުން އޭނާގެ އަތުން ފެނުނު މަސްތުވާތަކެތީގެ ބަރުދަނަކީ އާންމުކޮށް ޑޮކްޓަރުން ލިޔެދޭ މިންވަރަށްވުރެ ގިނަ މިންވަރެއް ކަމަށާއި އެ މިންވަރަށްވުރެ އިތުރަށް ގެންގުޅެފި ނަމަ އެއީ ވިޔަފާރިކުރަން އަތުގައި ބެހެއްޓުން ކަމަށް ގާނޫނުގެ ދަށުން ބެލެވޭ ކަމަށެވެ. އަދި ޝިބާޒަކީ އެ ބާވަތުގެ މަސްތުވާތަކެތި ގެންގުޅުމުގެ ހުއްދަ އޮތް މީހެއް ނޫން ކަމަށް ވެސް އެ ހުކުމުގައިވެ އެވެ.