ރާއްޖެއިން ހޯދެން ނެތް ފަރުވާ އަށް އަވަށްޓެރި އިންޑިއާ އަށް ދަތުރު ކުރުމަށް ތައްޔާރުވެފައި އޮތް ބޯޓަކަށް އެރި މީހުންގެ ތެރެއިން މީހަކު ކޮވިޑް19 އަށް ޕޮޒިޓިވްވުމުން ބޯޓު ހުއްޓުވައިފިއެވެ.
އެ ބޯޓަކީ މިއަދު ހެނދުނު ފުރަން ހަމަޖެހިފައި އޮތް ބޯޓެކެވެ. ފުރަން ތައްޔާރުވެފައި ވަނިކޮށް، އެ ބޯޓުގައި އިން ފަސަންޖަރެއްގެ ކޮވިޑު ޓެސްޓުގެ ނަތީޖާ ލިބުނު އިރު، އެ މީހާ އެ ބައްޔަށް ވަނީ ޕޮޒިޓިވްވެފައެވެ.
އެކަން އެނގުމުން އެ ބޯޓު ހުއްޓުވާ އެމީހާއާ ބޯޓުގައި ތިބި އެހެން ފަސިންޖަރުން ވަނީ ބޯޓުން ބާލާފައެވެ. އަދި ބޯޓު ޑިސްއިންފެކްޓު ކުރުމުގެ މަސައްކަތް އަންނަނީ ކުރަމުންނެވެ. މޯލްޑިވިއަން އިން ބުނީ ބޯޓު ޑިސްއިންފެކްޓު ކުރުމުގެ މަސައްކަތް ކުރަމުން އަދިވެސް އަންނަ ކަމަށެވެ. ބޯޓު ފުރާނީ އެކަން ނިމުމުން ކަމަށެވެ. އެގޮތުން ލަފާ ކުރެވެނީ މިއަދު މެންދުރުފަހު 15:00ގައި ބޯޓު އިންޑިއާ އަށް ފުރާނެ ކަމަށް ކަމަށް މޯލްޑިވިއަން އިން ބުނެއެވެ.
ލޮކްޑައުން އަށް ލުއިތައް ދިނުމާއި ގުޅިގެން ރާއްޖެއިން ކޮވިޑަށް ޕޮޒިޓިވްވާ މީހުން އަންނަނީ އިތުރުވަމުންނެވެ. އެގޮތުން މިހާތަނަށް މުޅި ޖުމްލަ ރާއްޖެއިން މިބައްޔަށް ޕޮޒިޓިވްވި އަދަދު ވަނީ 3،506 އަށް އަރާފައެވެ.