އާއްމުންގެ ތެރޭގައި ކޮވިޑް19 ބަލި ފަތުރަން އުޅޭ ކަމަށް ބުނެ ސޯޝަލް މީޑިއާގައި މިހާރު ދައުރުވަމުން އަންނަ ވީޑިއޯގެ މައްސަލަ ބަލަމުން އަންނަ ކަމަށް ފުލުހުން ބުނެފިއެވެ.
ފުލުހުން ބުނީ ސޯޝަލް މީޑިއާގައި ދައުރުވަމުން އަންނަ ވީޑިއޯ ވަނީ ފުލުހުންގެ ސަމާލު ކަމަށް އައިސްފައި ކަމަށެވެ. އަދި އެ ވީޑިއޯގައި ތުހުމަތު ކުރެވޭ ގޮތަށް މީހެއްގެ އަމަލުތައް ހުންނަ ކަމަށް ބެލެވޭ ކަމަށާއި އެކަމާއި ގުޅިގެން ބަލަންޖެހޭ ކަންކަން ފުލުހުން ބަލަމުން އަންނަ ކަމަށް ފުލުހުން ބުންޏެވެ.
އެ ވީޑިއޯ އާއި ގުޅޭ އިތުރު މައުލޫމާތު ލިބިފައިވާ ފަރާތެއްވާ ނަމަ ފުލުހުންގެ ޖެނެރަލް އިންވެސްޓިގޭޝަން ޑިޕާޓުމަންޓު ނަންބަރު 9631696 ނަންބަރަށް ގުޅާ އެ މައުލޫމާތު ހިއްސާ ކުރުމަށްވެސް ފުލުހުން ވަނީ އެދިފައެވެ.
އެ ވީޑިއޯ އިން ފެންނަނީ މާސްކު އަޅައިގެން ހުރި މީހަކު މާސްކު ނެގުމަށްފަހު އެމީހާގެ އަތް މުޅި މޫނުގައި ހާކާ މަންޒަރެވެ. އަދި އެމީހާގެ މޫނުގައި އަތް ހޭކުމަށްފަހު އެތަނުގައި ހުރި ދޮރެއްގައި އެމީހާގެ އަތް އުނގުޅާ މަންޒަރުވެސް ފެނެއެވެ.