ރޭ އިދިކޮޅު ކޯލިޝަނުން މާލޭގައި ކުރިޔަށް ގެންދިޔަ މުޒާހަރާގެ ތެރެއިން ފުލުހުން ހައްޔަރުކުރި މީހުން ދޫކޮށްލުމަށް ކޯޓުން އަމުރުކޮށްފިއެވެ.
މިކަމާއި ގުޅިގެން ފުލުހުން މިހާތަނަށް އެއްވެސް އެއްޗެއް އަދި ހާމަކޮށްފައެއް ނުވެއެވެ. ނަމަވެސް އެމީހުން ވަނީ ކޯޓުގެ އަމުރާއި އެކުގައި މިހާރު ފުލުހުންގެ ބަންދުން ދޫކޮށްލާފައެވެ.
ރޭގެ މުޒާހަރާވެސް ކުރީ މަޖީދީ މަގާއި ޗާންދަނީ މަގު ގުޅުނު ހިސާބުންނެވެ. ނަމަވެސް ފުލުހުން ވަނީ އެ ސަރަހައްދުން މުޒާހަރައިގެ ބައިވެރިން ފަހަތަށް ޖައްސާފައެވެ. އެއާއިއެކު މުޒާހަރާގެ ބައިވެރިން މާލޭގެ މަގުތަކުގައި ޝުއޫރު ފާޅުކުރަމުން ގެންދިޔައެވެ.
މުޒާހަރާގެ ބައިވެރިން ވަނީ ރައީސް އިބްރާހިމް މުހައްމަދު ސޯލިހުގެ އިސްތިއުފާ އަށާއި، ވައުދުތައް ފުއްދުމަށާއި ރައްޔިތުންނަށް އަނިޔާ ނުކުރުމަށް ގޮލާފާފައެވެ. އަދި ޖަލަށްލާފައިވާ ކުރީގެ ރައީސް އަބްދުﷲ ޔާމީން މިނިވަން ކުރުމަށް ވެސް މުޒާހަރާގެ ބައިވެރިން ވަނީ ގޮވާލާފައެވެ.
މީގެއިތުރުން އިންސާފު ގާއިމުކުރުމަށާއި، ފަނޑިޔާރުންނަށާއި މިނިވަން މުއައްސަސާތަކަށް ބިރު ދެއްކުން ހުއްޓާލަން ވެސް އިދިކޮޅުގެ މުޒާހަރާގެ ބައިވެރިން ވަނީ ގޮވާލާފައެވެ.