ޖެނުއަރީ 1ވަނަ ދުވަހުރޭ 11:00 ހާއިރު ހިތަދޫ ބޮޑުމަގުގައި ހުންނަ ފޭލި ފިހާރަ ކުރިމަތިން ހިނގި އެކްސިޑެންޓެއްގައި ސީރިއަސް އަނިޔާލިބުނު މީހާ އަށް ހޮސްޕިޓަލުގައި ފަރުވާ ދެމުންދަނިކޮށް ހޭނާރާ އޮވެ މިއަދު ހެނދުނު ނިޔާވެއްޖެއެވެ.
އެކްސިޑެންޓްގައި ނިޔާވެފައިވަނީ ހިތަދޫ ހާލާފަރު، މުހައްމަދު ދީދީ 27އ އެވެ.
ބާރު ސްޕީޑެއްގައި ސައިކަލު ދުއްވަފައި ދަނިކޮށް ކޮންޓްރޯލް ނުވެގެން ގޮސް ބޮޑުމަގުގައި ހުރި ފޭލި ފިހާރައިގެ ކައިރީގައި ޕާކް ކޮށްފައި ހުރި ސައިކަލެއްގައި ޖެހިގެން ހިނގި މިއެކްސިޑެންޓްގައި މުހައްމަދު ދީދީގެ ބޮލަށް ވަރަށް ބޮޑަށް ގެއްލުންވެފައިވާ ކަމަށް ހިތަދޫ ރީޖަނަލް ހޮސްޕިޓަލުން އޭނާ ބެއްލެވި ޑޮކްޓަރާއި ހަވާލާދީ އާއިލާއިން މައުލޫމާތު ދިނެވެ.
އާއިލާއިން ބުނީ އޭނާގެ ބޮލުގެ ނާށިގަނޑު ފަޅައިގެން ގޮސް ސިކުޑުއަށް ލޭ އެޅިފައިވާކަމަށެވެ. އެހެންވެ އޭނާ އިތުރު ފަރުވާއަށް މާލެ ގެންގޮސްފައިވަނީ އިއްޔެގެ ހެނދުނުގެ ވަގުތެއްގައި އެވެ.