ޑޮލަރު ހޯދައި ދޭނެ ކަމަށް ބުނެ މަކަރާއި ހީލަތުން މީހެއްގެ އަތުން ފައިސާތަކެއް އަތުލާފައިވާ މައްސަލައަކާ ގުޅިގެން ހިތަދޫ މީހަކު ހޯދަން ފުލުހުން ފަށައިފި އެވެ.
މި މައްސަލަ އާ ގުޅިގެން ހޯދަމުން ދަނީ ހިތަދޫ ޅަރީތިގެ މުޙައްމަދު ރަޝީދު،33، އެވެ.
ރަޝީދު ހޯދަން ފުލުހުން ފަށާފައި ވަނީ ޑޮލަރު ހޯދަައި ދޭނެ ކަމަށް ބުނެ މަކަރާއި ހީލަތުން މީހެއްގެ އަތުން 51،000ރ. އަތުލާފައިވާ ކަމަށް މި މަހުގެ 2 ވަނަ ދުވަހު ފުލުހުންނަށް ހުށަހެޅުނު މައްސަލައަކާ ގުޅިގެންނެވެ.
އެހެންވެ ރަޝީދު އާ ބެހޭ އެއްވެސް މަޢުލޫމާތެއް ލިބިފައިވާ ފަރާތެއްވާ ނަމަ ވީ އެންމެ އަވަހަކަށް މޯލްޑިވްސް ޕޮލިސް ސަވިސްގެ ފްރޯޑް އެންޑް ފައިނޭންޝިއަލް ކްރައިމް ޑިޕާރޓްމަންޓްގެ ނަންބަރު 9790048 ނުވަތަ މޯލްޑިވްސް ޕޮލިސް ސަވިސްގެ ހޮޓްލައިން 3322111 އަށް ގުޅުއްވައި މަޢުލޫމާތު ޙިއްސާ ކުރަން ފުލުހުން އެދެ އެވެ.
ފުލުހުން ބުނީ ރަޝީދު އާ ބެހޭ މަޢުލޫމާތު ހިއްސާ ކުރާ ފަރާތްތަކަށް ލިބި ދޭން ޖެހޭ ރައްކާތެރިކަން ވެސް ފޯރުކޮށް ދޭނެ ކަމަށެވެ.