ލިޓަސް ސާވިސް ސެންޓަރު ތެރޭގައި ވަޅިން ހަމަލާދީ މަރާލި ރ. މީދޫ، ފެންފިޔާޒުގޭ މުހައްމަދު އަނަސްގެ މަރާއި ގުޅިގެން ގިނަ ދުވަސްތަކެއް ވަންދެން އަޑުއެހުމެއް ނުބާއްވާ އޮތުމަށްފަހު މައްސަލައިގެ އަޑުއެހުމެއް ބާއްވަން ތާވަލުކޮށްފިއެވެ.
މި މައްސަލައިގެ ޝަރީއަތް ފަށާފައިވަނީ 2019 ވަނަ އަހަރުގެ ނޮވެންބަރު މަހުގެ ތެރޭގައެވެ. އެންމެ ފަހުން މައްސަލައިގެ އަޑުއެހުމެއް ބާއްވާފައި ވަނީ މިދިޔަ މާޗު މަހުގެ ތެރޭގައެވެ. ނަމަވެސް އޭގެފަހުން އެއްވެސް އަޑުއެހުމެއް ބާއްވާފައި ނުވެއެވެ. އަނަސްގެ މަރުގެ މައްސަލަ އަލުން ތާވަލުކޮށްފައިވަނީ، އަންގާރަ ދުވަހުގެ މެންދުރު 13:00 އަށެވެ.
އަނަސް މަރާލި މައްސަލައިގައި ދަޢުލަތުން ދައުވާކޮށްފައި ވަނީ ލ. ގަން، ތުނޑި، ނަންނާރިގެ ޖުނައިދު އަބްދުﷲ އާއި ސ. ފޭދޫ ވެސްޓަންވިލާ ހަސަން މަހްފޫޒް އާއި ދަފްތަރު ނަމްބަރު 1746 ސިމާހު މޫސާ އާއި ޅ. ކުރެންދޫ އަސުރުމާގެ އަހުމަދު ޒަޔާނާއި މ. ދިމިޝްގު، އުޘްމާން ޝަރީފާއި މ. ލޮނުމިދިލިގެ އަފްރާހު އަބްދުއްރައްޒާޤު އަދި ތ. ކިނބިދޫ ގުލްފާމްގެ މުހައްމަދު ޝާޒްގެ މައްޗަށެވެ.
މި ހުރިހާ އެންމެން ވެސް ވަނީ ދައުވާ އަށް އިންކާރު ކޮށްފައެވެ.