ހދ. މަކުނުދޫ އަދި އެ އަތޮޅު ފިނޭ އަށް ވެސް މީހުން އަރާ ފޭބުން މަނާކޮށްފިއެވެ.
މި ދެ ރަށުގެ ކައުންސިލަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ފޮނުވާފައިވާ އެންގުމުގައި ބުނެފައިވަނީ އެ ދެ ރަށަށް ވެސް އަރާ ފޭބުން މަނާ ކޮށްފައި ވަނީ ށުގައި މިވަގުތު ތިބި ބައެއް މީހުންގެ ކިބައިން، ކޮވިޑް-19 އަށް ޝައްކު ކުރެވޭ އަލާމާތްތައް ފެނުމާއި ގުޅިގެން ސިއްހީ ގޮތުން ބަލަން ޖެހޭ ކަންކަން ބެލުމަށް ކަމަށެވެ.
މަކުނުދޫއާ ފިނޭ އަށް އަރާ ފޭބުން މަނާކޮށްފައިވާއިރު ހދ.ނޮޅިވަރަމަށް އަރައި ފޭބުން ވެސް އެޗްޕީއޭ އިން ވަނީ މަނާކޮށްފައެވެ.
މި ދެ ރަށް މޮނީޓަރިންގެ ހާލަތަށް ގެނެސްފައިވާއިރު ހދ. އަދި ހއ. އަތޮޅުގެ ބައެއް ރަށްތަކަށް ދަތުރުކޮށްފައިވާ އިހަވަންދޫގެ ތަޚްތު ބޯޓުގެ ފަޅުވެރިއަކު ވަނީ ކޮވިޑަށް ޕޮޒިޓިވް ވެފައެވެ. އޭނާ ޕޮޒިޓިވްވުމާ ގުޅިގެން ކޮންޓެެކްޓް ޓްރޭސިންގެ މަސައްކަތް މިހާރު އެޗްޕީއޭ އިން އަންނަނީ ކުރަމުންނެވެ.
ކޮވިޑަށް ޕޮޒިޓިވްވާ މީހުންގެ އަދަދު އިތުރުވާން ފަށާފައިވާއިރު، އިއްޔެ އެކަނި ވެސް ރާއްޖެއިން ވަނީ 215 މީހަކު މި ބައްޔަށް ޕޮޒިޓިވް ވެފައެވެ. އޭގެތެރެއިން 149 މީހުންނަކީ ދިވެހިންނެވެ.
ކޮވިޑަށް ޕޮޒިޓިވްވާ މީހުންގެ އަދަދު އިތުރުވަމުންދާއިރު އެޗްޕީއޭ އިން ވަނީ 30 މީހުންނަށް ވުރެ ގިނައިން އެއްވެ އުޅޭ ހަރަކާތްތައް ބޭއްވުން މަނާކޮށްފަ އެވެ. އަދި މާލެ ސަރަހައްދުގައި ބޭރަށް ނިކުމެ އުޅޭއިރު މާސްކު އެޅުން މަޖުބޫރުކޮށްފައިވާއިރު ގައިދުރު ކަމަށް ސަމާލުކަން ދިނުމަށް ވެސް އެޗްޕީއޭ އިން އިލްތިމާސްކުރެއެވެ.