ފަތުރުވެރިކަމުގެ ވިޔަފާރިތައް ހިންގުމަށް ދޫކުރާ ބިމުގެ ކުލިން ނަގާ ޖޫރިމަނާ ކުޑަކޮށްފައިވާ ކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިސްޓް ރިސޯޓާއި، ޓޫރިސްޓް ހޮޓަލާއި، ޓޫރިސްޓް ގެސްޓްހައުސް ހެދުމަށް ކުއްޔަށްދޭ ރަށްރަށާއި ބިންބިމުގެ ކުލި ސަރުކާރަށް ދެއްކުމާ ބެހޭ ގަވާއިދަށް އިސްލާހު ގެނެސް މިއަދު ގެޒެޓްކޮށްފައިވާއިރު އެ އިސްލާހުގައި ބުނެފައި ވަނީ އެ ތަންތަނުގެ ކުލި މަހުން މަހަށް ނުދައްކާ ކަުގައިވާނަމަަ ޖޫރިމަނާގެ ގޮތުގައި ނަގަމުންދާނީ ހިނގާ ކޮންމެ ދުވަހަކަށް، ނުދައްކާ އޮތް ކުލީގެ 0.0493 އިންސައްތަ ކަމަށެވެ.
މީގެ ކުރިން ކުލި ނުދައްކައިފި ނަމަ ނަގަމުން ދިޔައީ ހިނގާ ކޮންމެ ދުވަހަކަށް، ނުދައްކާ އޮތް ކުލީގެ 0.5 އިންސައްތައެވެ.
މި ލުއިތަކުގެ އިތުރުންވެސް ފަތުރުވެރިކަމުގެ ދާއިރާގެ ވިޔަފާރި ކުރާ ފަރާތްތަކައް އިތުރު ލުއިތައް ސަރުކާރުން ވަނީ ދީފައެވެ. އެގޮތުން ރިސޯޓުތަކުން ދައްކަންޖެހޭ ކުލި ޖޫން 2021 އިން ފެށިގެން ދެއްކުމަށް ފަސްކޮށް ދިނުމަށް ވެސް ވަނީ ނިންމައިފައެވެ.
މީގެއިތުރުން ފިނޭންސް މިނިސްޓްރީން ކުއްޔަށް ދީފައި ހުރި އެހެން ބިންތަކުގެ ކުލިވެސް 6 މަސް ދުވަހަށް ފަސްކޮށްދިނުމަށް ވެސް ސަރުކާރުން ވަނީ ނިންމާފައެވެ.