ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން އިއްވި ހުކުމްގެ އިސްތިއުނާފު ޝަރީއަތުގެ އަޑުއެހުން މާދަމާ ބޭއްވުމަށް ހަމަޖެހި ނަމަވެސް މިހާރު އެ އަޑުއެހުން ކެންސަލް ކޮށްފިއެވެ.
މި އަޑުއެހުން ކެންސަލް ކޮށްފައި ވަނީ ރައީސް ޔާމީންގެ އެދިވަޑައިގެން ކަމަށް ބައެއް މީޑިއާތަކުގައި ވަނީ ރިޕޯޓު ކޮށްފައެވެ. އެގޮތަށް އެދުނީ ކޮވިޑް19 ގެ ސަބަބުން ރައްކާތެރިކަމުގެ ފިޔަވަޅެއްގެ ގޮތުގައެވެ.
މި މައްސަލައިގެ އަޑުއެހުމެއް އެންމެ ފަހުން ބާއްވާފައި ވަނީ މިދިޔަ މަހުގެ 8ވަނަ ދުވަހުއެވެ. އެދުވަހުގެ ބައްދަލުވުމުގައި އަދީބަށް ގުޅާފައިވަނީ ކެމްޕެއިން ފައިސާ ހޯދަން ކަމަށް ތަކުރާރުކޮށް ރައީސް ޔާމީން ވިދާޅުވާ ވާހަކަފުޅު އެ ދުވަހުގެ އަޑުއެހުމުގައިވެސް ވިދާޅުވިއެވެ.
އެދުވަހުގެ އަޑުއެހުން ނިންމާލައްވަމުން ރައީސް ޔާމީން ވަނީ އެމަނިކުފާނުގެ ވަކީލުންނާއި ބައްދަލުކުރެވޭނެ އިންތިޒާމު ހަމަޖައްސައި ދެއްވުމަށް ކޯޓުގައި އެދިފައެވެ. އަދި ކޯޓުން ވަނީ އެކަން ހަމަޖައްސައި ދިނުމަށް ދައުލަތުގައި އެދިފައެވެ. ނަމަވެސް އެ އިންތިޒާމުތައް ހަމަޖައްސައި ދީފައި ނުވާތީ ރައީސް ޔާމީންގެ ފަރާތުން ވަނީ ކަންބޮޑުވުން ފާޅުކޮށްފައެވެ.