ރާއްޖޭގައި ހަލުވިކަމާއި އެކުގައި ކޮވިޑް19 ފެތުރެމުން އަންނާތީވެއާ ރަށްރަށުގައި މިބަލި ފެތުރުން ކޮންޓްރޯލް ކުރުމަށް ރާއްޖޭގައި މީހުން ދިރިއުޅޭ ހުރިހާ ރަށެއްގައިވެސް މާސްކު އެޅުމަށް އަންގައިފިއެވެ.
މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި ހެލްތު މިނިސްޓްރީގެ ޕޮލިސީ ޕްލޭނިން އެންޑް އިންޓަނޭޝަނަލް ހެލްތު އާއިޝަތު ސާމިޔާ ވިދާޅުވީ އެއްފަސް ވެފައި ހުންނަ ތަންތަނުގައި ކަނޑުމަގުން ދިގު ދަތުރުކުރާނަމަ މާސްކު މާސްކު އެޅުން މިއަދުން ފެށިގެން މަޖުބޫރުވާނެ ކަމަށެވެ.
އަދި މީހުން ދިިރިއުޅޭ ހުރިހާ ރަށެއްގައި ވެސް މާސްކު އެޅުމަށް ރިކޮމެންޑް ކުރާ ކަމަށާއި މާސްކު ލިބުމުގައި ދަތިތަކެއް ހުންނާނެތީ ފޮތި މާސްކު ބޭނުން ކުރުމަށް އިލްތިމާސްކުރާ ކަމަށް ސާމިޔާ ވިދާޅުވިއެވެ.
"މީހުން ދިރިއުޅޭ ހުރިހާ ރަށެއްގައި ވެސް ފޮތި މާސްކު ބޭނުން ކުރުން މި ރެކޮމެންޑް މިކުރަނީ" ސާމިޔާ ވިދާޅުވިއެވެ.
ފުރަބަންދު ކަރަންޓީނުގައިވާ މީހުންގެ ތެރެއިން ގިނަ ބަޔަކު މާލެ ރަށްރަށަށް ގޮސްފައިވާ ކަމަށާއި، ބަލި ހުރިކަން އަދި ފާހަގަވެފައި ނުވެ ހުރުން އެކަށީގެން ވާތީ މިހާރުން ފެށިގެން ފޮތި މާސްކު އެޅުމަށް އިލްތިމާސްކުރާ ކަމަށްވެސް ސާމިޔާ ވިދާޅުވިއެވެ.
މީހުން ދިރިއުޅޭ ރަށްރަށުގެ ރައްޔިތުން ވެސް މާސްކު އަޅަން އަންގާފައިވާއިރު، ޒަރޫރީ ބޭނުމެއްގައި ނޫނީ މާލެއިން މީހުން ރަށްރަށަށް ނުފޮނުވަން ވެސް މިހާރު ވަނީ ނިންމާފައެވެ.
މާލޭގެ އިތުރުން ރަށްރަށުން ވެސް ކޮވިޑްގެ ކޭސްތައް ފެންނަން މިހާރު ވަނީ ފަށާފައެވެ. އެގޮތުން މިހާތަނަށް 10 ރަށަކުން ކޮވިޑްގެ ކޭސްތައް ވަނީ ފެނިފައެވެ.