އެމްޑީޕީގެ ހިތަދޫ އުތުރު ދާއިރާގެ ޒުވާނުންގެ ރައީސް މުސްތަންސިރު މުސްޠަފާ (ސިރު) މިރޭ ފުލުހުންގެ ބެލުމުގެ ދަށައް ގެންގޮސްފިއެވެ.
މައުލޫމާތު ލިބިފައިވާ ގޮތުގައި ސިރު އެސްއޯ ފުލުހުންގެ ބެލުމުގެ ދަށައް ގެންގޮސްފައިވަނީ ހިތަދޫ ބޮޑު މަގުގައި ހިނގި ހަމަނުޖެހުމެއްގެ ތެރޭގައެވެ.
އެހިސާބުން ވާހަކަ ދެއްކި މީހަކު ބުނީ ހަމަނުޖެހުން ހިގުމަށް މެދުވެރިވީ ހިތަދޫ ބޮޑު މަގުން ޖުމްހުރީ ޕާޓީ ގުޅުމުގެ ވެހިކަލެއް ދަތުރު ކުރަނިކޮށް އެމްޑީޕީގެ ވެހިކަލަކުން ހުރަސް އަޅަން މަސައްކަތް ކުރުމުންނެވެ. އަދި އެހަމަ ނުޖެމުހެ ތެރޭގައި ޖުމްހުރީ ގުޅުމުގެ އިސްކޮށް ހަރަކާތްތެރިވާ ހިތަދޫ ފާޒް، އިނާޒް މުހައްމަދު ދީދީ ވަށާލައި އެމްޑީޕީގެ ސަޕޯޓަރުން ވަނީ ހަޅޭލަވައި އަޑުގަދަކޮށްފައެވެ.
ފުލުހުންގެ މީޑިއާ އޮފިޝަލް ވިދާޅުވީ ދެ ފަރާތެއްގެ ދެމެދުގައި ހަމަ ނުޖެހުން ހިނގައިގެން އުޅޭ ކަމުގެ މައުލޫމާތު ލިބުމާއި ގުޅިގެން އެ ސަރަހައްދަށް ގޮސް ހަރަކާތްތެރިވަމުން ދަނިކޮށް ފުލުހުންގެ ވާޖިބަށް ހުރަސް އެޅި 32 އަހަރުގެ މީހަކު ފުލުހުންގެ ބެލުމުގެ ދަށައް ގެންގޮސްފައިވާ ކަމަށެވެ.
ސިރު ފުލުހުންގެ ބެލުމުގެ ދަށައް ގެންދިއުމާއި ގުޅިގެން ގިނަ އަދަދެއްގެ އެމްޑީޕީ ސަޕޯޓަރުން ވަނީ މިހާރު ހިތަދޫ ޕޮލިސް ސްޓޭޝަން ސަރަހައްދަށް އެއްވެފައެވެ. އަދި ސިރު ދޫކޮށްލުމަށް ގޮވަމުން އެބަދެއެވެ.