ކޮވިޑް19 އާއި ގުޅިގެން ރާއްޖޭގެ ގިނަ ވިޔަފާރިތައް މިވަގުތު އޮތީ އޮކްސިޖަން ބޭނުންވާ ހާލަތުގައި ކަމަށް ރައްޔިތުން މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް ވިދާޅުވެއްޖެއެވެ.
ޝަރީފު ކުރެއްވި ޓުވީޓުތަކެއްގައި ވިދާޅުވެފައިވަނީ ސަރުކާރުގެ ކިބައިގައި ހުރި ހުރިހާ ފިސްކަލް އާލަތްތަކެއް ބޭނުންކޮށްގެން އިޤުތިޞާދު ހިނގާ ކަން ކަށަވަރުކުރަންޖެހޭ ކަމަށެވެ. މީގެއިތުރުން ރައްޔިތުންގެ ފުރާނައާ ވަޒީފާތަކަކީ ހިމާޔަތް ކުރަންޖެހޭ ކަންކަން ކަމަށް ޝަރީފް ވިދާޅުވިއެވެ،
ސަރުކާރުން ވިޔަފާރިތަކަށް ދެމުން ގެންދާ އެހީތަކަށް ތައުރީފު ކުރައްވާ ޝަރީފު ވިދާޅުވީ ސްޓިމިއުލަސް ނުވަތަ ރިލީފް ޕެކޭޖުން އިގްތިސޯދުގައި ފައިސާ ދައުރުވަމުން ދިޔަ ކަމަށެވެ. އަދި އެ ފައިސާގެ ސަބަބުން ވިޔަފާރިތަކަށް އައިސްފައިވާ ހީނަރުކަމުގެ އަސަރުތައް ކުޑަވެގެން ދިޔަ ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ އެންމެ ބޮޑަށް އެހީ ބޭނުންވެފައި އޮތީ ފަތުރުވެރިކަމަށް ކަމަށާއި ފަތުރުވެރިކަމުގެ ހީނަރު ކަމުން އަރައިގަތުމަށް އިތުރު އެހީތެރިކަމެއް ބޭނުންވާ ކަމަށް ޝަރީފް ވިދާޅުވިއެވެ.
އިގްތިސޯދީ ބަދަލުތަކާއި އެކުގައި މަޖިލީހަށް ސަރުކާރުން އައު ބަޖެޓެއް ހުށަހަޅަން ޖެހޭނެ ކަމަށާއި އެ ބަޖެޓު ވާންޖެހޭނީ ސަރުކާރުން ވިޔަފާރިތަކަށް އިންވެސްޓު ކުރުމުގެ އިތުރުން އިގްތިސޯދަށް ދިރުންދޭ ބަޖެޓަކަށް ކަމަށް ޝަރީފް ވިދާޅުވިއެވެ.