ހއ. އިހަވަންދޫ އިން ކޮވިޑް19 އަށް ދެ މީހަކު ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ އެ ބައްޔަށް އިހަވަންދޫ އިން ޕޮޒިޓިވްވެފައި ވަނީ "ތަހުތު ބޯޓު"ގެ ފަޅުވެރިންގެ ގޮތުގައި މަސައްކަތްކުރާ ދެ ބިދޭސީން ކަމަށެވެ.
"ތަހުތު ބޯޓު"ގެ ބަޔަކު ކޮވިޑް19 އަށް ޕޮޒިޓިވްވުމުން 41 ސާމްޕަލްއެއް އިހަވަންދޫ އިން ނެގިއެވެ. ޕޮޒިޓިވްވި ބަންގްލަދޭޝް ދެ މީހުންނަކީ އޭގެތެރޭގައި ހިމެނޭ ދެ މީހުންނެވެ.
މިއަދު ވެސް ރާއްޖެއިން ކޮވިޑް19 އަށް 86 މީހަކު ވަނީ ޕޮޒިޓިވްވެފައެވެ. އެޗްޕީއޭ އިން އާންމު ކުރި ކޮވިޑްގެ ތަފާސް ހިސާބުތަކުން ދައްކާ ގޮތުން މިއަދު ޕޮޒިޓިވްވި މީހުންގެ ތެރޭގައި ހިމެނެނީ، 56 ދިވެހިންނާއި 30 ބިދޭސީންނެވެ.
މިއަދު ޕޮޒިޓިވްވި މީހުންނާއެކު މިހާތަނަށް ރާއްޖެއިން ޕޮޒިޓިވްވި މީހުންގެ އަދަދަކީ، 4,680 އެވެ.