ހދ. ނައިވާދޫ ހޯމް ކަރަންޓީނުގައި ހުރި ދިވެއްސަކު ކޮވިޑް19 އަށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ އެމީހާއަކީ 68 އަހަރުގެ ފިރިހެނެއް ކަމަށެވެ. މާލެއިން ހޯމް ކަރަންޓީނަށް ނައިވައިދޫ އަށް ދިޔަ އެމީހާ ޕޮޒިޓިވްވިކަން އެނގުނީ ކަރަންޓީން ނިންމާ ޓެސްޓު ހެދުމުންނެވެ.
މިފަހަކަށް އައިސް މާލެއިން ހޯމް ކަރަންޓީނަށް ގޮސް ތިބޭ މީހުން ކަރަންޓީން ނިމުމުން ހަދާ މީހުން އަންނަނީ މި ބައްޔަށް ޕޮޒިޓިވްވަމުންނެވެ. އެހެންކަމުން މިހާރު ޒަރޫރީ ބޭނުމެއް ނޫނީ މާލެއިން ރަށްރަށަށް ދިއުމުގެ ހުއްދައެއް ނުލިބޭނެއެވެ. އެގޮތަށް ނިންމީ އަތޮޅުތެރޭގައި ބަލި ފެތުރުން ކޮންޓްރޯލް ކުރުމުގެ ގޮތުން ކަމަށް ހެލްތު އިމަޖެންސީ އޮޕަރޭޝަން ސެންޓަރުން ވަނީ ބުނެފައެވެ.
މިއަދު ވެސް ރާއްޖެއިން ކޮވިޑް19 އަށް 86 މީހަކު ވަނީ ޕޮޒިޓިވްވެފައެވެ. އެޗްޕީއޭ އިން އާންމު ކުރި ކޮވިޑްގެ ތަފާސް ހިސާބުތަކުން ދައްކާ ގޮތުން މިއަދު ޕޮޒިޓިވްވި މީހުންގެ ތެރޭގައި ހިމެނެނީ، 56 ދިވެހިންނާއި 30 ބިދޭސީންނެވެ.
މިއަދު ޕޮޒިޓިވްވި މީހުންނާއެކު މިހާތަނަށް ރާއްޖެއިން ޕޮޒިޓިވްވި މީހުންގެ އަދަދަކީ، 4,680 އެވެ.