ހއ. ފިއްލަދޫ އިން ތިން މީހަކު ކޮވިޑް19 އަށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ އިން ބުނީ އެ މީހުންގެ ތެރޭގައި ދިވެއްސަކާއި ބަންގްލަދޭޝް ދެ މީހަކު ހިމެނޭ ކަމަށެވެ. އެމީހުންނަކީ ފިއްލަދުއާއި މާލެ އާއި ދެމެދު ދަތުރުކުރާ "ބީއެމްއެމްއޭ އެކްސްޕްރެސް" ބޯޓުން ތިން ފަޅުވެރިންނެވެ.
އެމީހުންނަކީ "ސަވާރީ" ބޯޓުން ޕޮޒިޓިވްވި މީހުންނާއި ބައްދަލުވެފައިވާ މީހުން ކަމަށް މައުލޫމާތު ލިބެއެވެ. ފިއްލަދޫ އިން ތިން މީހަކު ކޮވިޑަށް ޕޮޒިޓިވްވިއިރު "ތަހުތު" ބޯޓުގެ ކޭސްއާ ގުޅިގެން އިހަވަންދޫ އިން ދެ މީހަކު ވަނީ ކޮވިޑަށް ޕޮޒިޓިވްވެފައެވެ.
މީގެއިތުރުން ހދ. ނައިވާދޫ ހޯމް ކަރަންޓީނުގައި ހުރި އުމުރުން 68 އަހަރުގެ ދިވެހި ފިރިހެނަކު ވެސް ވަނީ ކޮވިޑް19 އަށް ޕޮޒިޓިވްވެފައެވެ.
މިއަދު ވެސް ރާއްޖެއިން ކޮވިޑް19 އަށް 86 މީހަކު ވަނީ ޕޮޒިޓިވްވެފައެވެ. އެޗްޕީއޭ އިން އާންމު ކުރި ކޮވިޑްގެ ތަފާސް ހިސާބުތަކުން ދައްކާ ގޮތުން މިއަދު ޕޮޒިޓިވްވި މީހުންގެ ތެރޭގައި ހިމެނެނީ، 56 ދިވެހިންނާއި 30 ބިދޭސީންނެވެ.
މިއަދު ޕޮޒިޓިވްވި މީހުންނާއެކު މިހާތަނަށް ރާއްޖެއިން ޕޮޒިޓިވްވި މީހުންގެ އަދަދަކީ، 4,680 އެވެ.